Birqatar sýbektilerden josyqsyz báseke faktileri anyqtaldy - Básekelestikti qorǵaý agenttigi
ASTANA. 30 shilde. QazAqparat - QR Básekelestikti qorǵaý agenttiginde Ádistemelik keńestiń kezekti otyrysy bolyp ótti.
Onda naryq sýbektilerine qatysty tergeý nátıjeleri qaraldy. Bul týraly vedomstvonyń baspasóz qyzmetinen habarlandy.
Naryqqa júrgizilgen tergeý nátıjeleri barysynda birqatar sýbektilerde josyqsyz básekelestikti júrgizý faktileri anyqtalǵan. «Atap aıtqanda, jeke kásipker retinde tirkelgen «Imamalıev D.A.» «FINISH P» taýar belgisimen oramaǵa ólshep salynǵan «AlinEx» shpatlevka-qurylys qospalaryn satýdy júzege asyrǵan. Al, «FINISH P» taýar belgisiniń ıesi «Alina Trade» seriktestigi bolyp tabylady jáne atalǵan seriktestik taýar belgisin paıdalaný quqyǵyn bermegen bolyp shyqty. Osyǵan oraı, jeke kásipker «Imamalıev D.A.» áreketi taýar belgilerin zańsyz paıdalanǵany retinde qaralyp, «Básekelestik týraly» QRZ 16-babynyń 2-tarmaǵynyń 1-tarmaqshasyna sáıkes josyqsyz básekelestikke jatady», - delingen baspasóz baıanynda.
Sondaı-aq kelip túsken shaǵymdy tekserý barysynda da «Qazaqtehresýrs» JShS qyzmetindegi zańsyzdyqtar anyqtaldy. Mysaly, atalǵan seriktestik «ST-KZ» sertıfıkatyn jáne tejegish kompozıtsııalyq qalypty (Reseıde shyǵarylǵan) serııalyq óndirýge sertıfıkat bere otyryp, otandyq óndirýshiler úshin memleket tarapynan bolatyn quqyqtar men jeńildikterdi paıdalanyp kelgen.
«Daıyndama brıketi negizinen «Ýral ATI» kompanııasynda óndirilgen bolsa, jasalǵan sharttyń erejelerine sáıkes qalyptyń barlyq partııasyna «Qazaqtehresýrs» JShS-nyń tańbasy qoıylǵan. Sonymen qatar, «Qazaqtehresýrs» temir jol júk vagondary úshin tor-symmen tejegish kompozıtsııalyq qalypty óndirýge óziniń belgisimen «ÝralATI» kompanııasynyń daıyndama brıketin paıdalanǵan. Tańba talaptaryna sáıkes tutynýshylarǵa arnalǵan aqparatta daıyndaýshynyń kórsetilgen ataýy onyń ornalasqan elinde tirkelgen ataýǵa sáıkes kelýi tıis. Osylaısha, «Qazaqtehresýrs» JShS áreketi taýardyń shyqqan orny týraly tutynýshyny jańylystyrýǵa ákelýi múmkin. ıAǵnı, atalǵan jaǵdaıda taýardy tutynýshy otandyq retinde qabyldaýy múmkin, al biraq ony óndirýshiler reseılik kompanııa bolyp tabylady. «Qazaqtehresýrs» JShS-nyń áreketi taýar belgilerin zańsyz paıdalaný retinde qarastyrylyp otyr», delingen baspasóz baıanynda.
