Birqatar shet memleketterdiń jas ǵalymdary elordada bas qosty
ASTANA. QazAqparat - Elordada «Uly Dala jastary: tarıhı mıssııa jáne bolashaǵy birtutas Ult qalyptastyrý» atty jas ǵalymdardyń halyqaralyq ǵylymı konferentsııasy uıymdastyryldy, dep habarlaıdy QazAqparat tilshisi.
«Jalpy, maǵynasyna, taqyrybyna baılanysty mańyzdy konferentsııa halyqaralyq deńgeıde uıymdastyrylǵany úshin alǵys aıtqym keledi. Barlyqtaryńyz bilesizder, Elbasy Nursultan Nazarbaev 2019 jyldy Jastar jyly dep jarııalaǵan bolatyn. Sondyqtan osy jyl Qazaqstan jastary úshin óte serpindi ári maǵynaly jáne nátıjeli bolýyna tek Úkimet nemese Parlament qana emes, sonymen birge jalpy qoǵam, jastardyń da belsendi atsalysýy mańyzdy. Osy oraıda elimizdiń ary qaraı damýyna bul baǵyttaǵy qadamdar bıyl tyń serpin beredi degen oıdamyz», - dedi Parlament Májilisiniń depýtaty Baqtııar Máken.
Depýtattyń sózinshe, jas ǵalymdardyń tıisti jabdyqtardy jáne basqa da qajettilikterdi satyp alýǵa qarjynyń jetispeıtini týraly shaǵymdar aıtylǵan edi. Búginde jastar ǵylymyna joǵary ekpin qoıylýy kerek. Sondyqtan jas ǵalymdardyń ǵylymı qyzmetin qarjylandyrý máselesi Jastar jylynyń ashylýyna negizgi sebepterdiń biri boldy.
«Jastar jylynyń ashylýynda Elbasy bólingen qarjynyń tııanaqty ıgerilýin tapsyrǵan bolatyn. Sonyń ishindegi bastysy - ol jastardyń ǵylymǵa betburysy. Osy oraıda jas urpaqtyń ǵylymǵa izdenisin yntalandyrý mindeti tur. Bul turǵyda jas ǵalym jobasy aıasynda 3 mlrd teńge bólinedi. Jalpy, búginde ǵylymmen aınalysatyn jastardyń izdenisi bar jáne osy baǵytta sapaǵa nazar aýdarǵan jón», - dedi depýtat.
Aıta keteıik, konferentsııada Qazaqstanda jastar saıasatyn júzege asyrý sharalarymen baılanysty aýqymdy taqyryptar talqylanbaq. Sonymen qatar otandyq tarıh ǵylymynyń ózekti máselelerine erekshe kóńil bólindi. Osy oraıda Qazaqstan men sheteldik ǵalymdardyń qoǵamdyq sanany jańǵyrtýdaǵy tarıh ǵylymynyń rólimen mıssııasy, zııatkerlik ult qalyptastyrý máselesine qatysty tolymdy pikir almasý ótedi.
Halyqaralyq konferentsııany QR Tuńǵysh Prezıdenti-Elbasynyń Qory QR BǴM Ǵylym komıteti Memleket tarıhy ınstıtýtymen birlesip ótkizýde. Sharaǵa kórshiles jáne alys shetelden ǵalymdar da keldi. Olar óz elderinde jastardyń ǵylymmen aınalysýyn yntalandyrý baǵytynda tájirıbelerimen bólisip jatyr.
