Birqatar saıasatkerler Qasym-Jomart Toqaevty quttyqtap, jedelhat joldady
Qasym-Jomart Toqaevtyń Qazaqstan Prezıdenti bolyp saılanýyna oraı quttyqtaý jedelhattary kelip túsýde.
Saýd Arabııasynyń koroli Salman ben Abdel Ázız Ál Saýd quttyqtaý hatynda Qasym-Jomart Toqaevtyń jumysyna tabys, Qazaqstanǵa baq-bereke tiledi.
Birikken Arab Ámirlikteriniń Prezıdenti Halıfa ben Zaıd Ál Nahaıan da Memleket basshysyna amandyq jáne Qazaqstanǵa baq-bereke tileıtinin jetkizdi.
«Bizdiń halyqtarymyz ben dostas memleketterimizdiń ıgiligi úshin ekijaqty qarym-qatynastardyń odan ári damı túsetinine senim bildiremin», - delingen jedelhatta.
Bahreın Koroli Hamad ıbn Isa Ál Halıfa eki el halyqtary arasyndaǵy ózara tıimdi qatynastardy damytý maqsatynda kópqyrly yntymaqtastyqty nyǵaıtý úshin birlesip jumys isteýge ázir ekenin aıtty.
Búkilálemdik ıslam lıgasynyń Bas hatshysy Muhammed bın Abdel Karım ál-Issa Qasym-Jomart Toqaevty osy uıymǵa múshe barlyq musylman elderiniń atynan quttyqtady.
«Otanyńyzdyń jáne halyqaralyq qyzmetterdiń ıgiligi, beıbitshilik pen kelisimniń, ósip-órkendeý jolyndaǵy Sizdiń jumystaryńyzǵa tolaǵaı tabys tileımin», - dep jazdy Muhammed bın Abdel Karım ál-Issa.
Brýneı sultany Hassanal Bolkıah ta Qasym-Jomart Toqaevty Prezıdent bolyp saılanýymen quttyqtap, eki el arasyndaǵy ekijaqty yntymaqtastyqty, halyqaralyq uıymdar aıasyndaǵy ózara is-qımyldardy tereńdetýge daıyn ekenin jazdy.
Túrki Parlamenttik Assambleıasynyń Bas hatshysy Altynbek Mamaıýsýpov túrkitildes memleketterdiń parlamentteriniń ózara dostyq qatynastary men yntymaqtastyǵynyń odan ári damýyna senim bildirdi.
Sonymen qatar, Qasym-Jomart Toqaevtyń atyna Islam Yntymaqtastyq Uıymynyń Bas hatshysy ıÝsef ben Ahmad ál-Oseımın, BAÁ Vıtse-prezıdenti, Premer-Mınıstri, Dýbaı bıleýshisi Muhammed ben Rashıd Ál Maktým, Saýd Arabııasynyń koroldiginiń taq murageri, Mınıstrler keńesi tóraǵasynyń orynbasary, qorǵanys mınıstri Muhammed ben Salman Abdel Ázız Ál Saýd, Abý Dabıdiń taq murageri, BAÁ Qarýly Kúshteriniń Bas qolbasshysynyń orynbasary Muhammed ben Zaıd Ál Nahaıan, BAÁ Vıtse-Premeri, Prezıdent isteri jónindegi mınıstri Mansur ben Zaıd Ál Nahaıan, Túrki mádenıeti jáne murasy qorynyń Prezıdenti Gıýnaı Efendıeva quttyqtaýlaryn joldady.
