Birqatar respýblıkalyq kúre jolda erigen qar sýy buryldy
«QazAvtoJol mamandary kólikterdiń júrip-turýyn úzdiksiz qamtamasyz etý úshin sý basý qaýpi bar jol ýchaskelerin táýlik boıy baqylaýda. Máselen, ótken túnde jolshylar Batys Qazaqstan jáne Aqtóbe óńirlerindegi úsh respýblıkalyq trassanyń jeti ýchaskesinde erigen qar sýyn burý jumystaryn atqardy. Nátıjesinde sý basý qaýpi seıildi.
Jolshylar erigen qar sýyn motopompalarmen shyǵaryp, jol jıekterin ınertti materıaldary bar 2100 birlik qappen nyǵaıtty. Qazir qozǵalys shtattyq rejımde júzege asyrylýda», - dep jazdy vedomstvodan.
Joǵaryda atalǵan jumystar Aqtóbe oblysyndaǵy M-36 «Samara-Shymkent» tasjolynyń 576-578 shaqyrymdarynda jáne A-26 «Qandyaǵash-Embi-Shalqar-Yrǵyz» kúre jolynyń 170, 182, 187 shaqyrymdarynda júrgizildi. Al Batys Qazaqstan oblysynda bul jumystar M-36 «Samara-Shymkent«tasjolynyń 479 shaqyrymynda jáne»Podstepnoe – Fedorovka«kúre jolynyń 11 shaqyrymynda atqaryldy.
Erigen qar sýyn burý jumystaryna 50 maman men 20 arnaıy tehnıka jumyldyryldy.
Respýblıkalyq mańyzy bar barlyq avtojoldar ashyq, sý basqan ýchaskeler tirkelgen joq.