Birqatar óńirlerde mektepterde kúrdeli jóndeý jumystaryna qarjylandyrý tolyq kólemde kózdelmegen
ASTANA. QazAqparat - Jaz kezinde kúrdeli jóndeý 373 mektepte júrgizildi. Bul týraly búgin Ortalyq kommýnıkatsııalar qyzmetindegi baspasóz qyzmetinde Bilim jáne ǵylym vıtse-mınıstri Elmıra Sýhanberdıeva málim etti.
«Respýblıkadaǵy 526 mektep kúrdeli jóndeý júrgizýdi, 6600-inde aǵymdaǵy jóndeý jumystaryn qamtý qajettigi boldy. Jaz kezinde kúrdeli jóndeý 373 mektepte, al aǵymdaǵy jóndeý sharalary 5745 mektepte júrgizildi. Qajettilik boıynsha tolyq jóndeýdi Aqmola, Atyraý, Qaraǵandy, Qyzylorda, Pavlodar, Soltústik Qazaqstan, Ońtústik Qazaqstan oblystary jáne Astana qalasy iske asyrdy», - dedi ol.
Vıtse-mınıstrdiń aıtýynsha, birqatar óńirlerde qajettilik boıynsha kúrdeli jóndeý jumystaryna qarjylandyrý tolyq kólemde kózdelmegen. Máselen, Almat oblysynda qajettilik 48 mektepti qurasa, kúrdeli jóndeý 26 nysanda júrgizildi. Al ShQO-da jóndeý qajettiligi 68 mektep bolsa, kúrdeli jóndeý jumystary 19 ǵımaratta júrgizildi.
«Oqý jylynyń bastalýyna baılanysty qalǵan óńirlerde mektepterdi qabyldaý jónindegi komıssııalardyń jumysy jalǵasýda», - dedi E. Sýhanberdıeva.
