Birqatar óńirlerde kámeletke tolmaǵan balalar arasynda qylmys kórsetkishi artqan
ASTANA. QazAqparat - Bilim jáne ǵylym mınıstri Erlan Saǵadıevtiń tóraǵalyǵymen óńirlerdi qosý arqyly beınekonferentsbaılanys rejıminde QR Úkimeti janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komıssııanyń kezekten tys otyrysy ótti. Bul týraly atalǵan vedomstvonyń baspasóz qyzmeti habarlaıdy.
«Sońǵy ýaqytta elimizdiń birqatar aımaqtarynda bilim berý uıymdarynyń qabyrǵalarynda da, odan tys jerlerde de oqýshylar arasynda toptyq tóbeles, uryp-soǵý jáne qorlaý jaǵdaılary jıilep ketti. Ókinishke qaraı, osyndaı jaǵdaılardyń saldarynan Aqtóbe oblysynda bala qaza boldy. Óńirler boıynsha 2017 jylmen salystyrǵanda kámeletke tolmaǵan balalar jasaǵan qylmystardyń sany Atyraý oblysynda 39,6%-ǵa, Almaty qalasynda 33,5%-ǵa, Qyzylorda, Mańǵystaý oblystarynda jáne Astana qalasynda 18%-ǵa, Aqmola jáne Aqtóbe oblystarynda 11%-ǵa, Túrkistan oblysynda 7,8%-ǵa óskeni baıqalady» delingen habarlamada.
Qazaqstan Respýblıkasy Іshki ister mınıstrliginiń aqparaty boıynsha, 2018 jyly jasóspirimderdiń qatysýymen quqyqqa qarsy is-áreketter jasaý faktileri týraly Quqyq qorǵaý organdarynan jasyrǵany nemese der kezinde habarlamaǵany úshin bilim berý uıymdarynyń 170-ten astam qyzmetkeri ákimshilik jaýapkershilikke tartyldy. Budan bólek, keıbir mektep ákimshilikteri oqýshylar arasyndaǵy jaǵdaıǵa ıe emes nemese jalǵan ıgilikterdi saqtaý maqsatynda olardy qasaqana jasyryp otyrady. Qalyptasqan jaǵdaı balalar arasyndaǵy qylmystyń aldyn alý boıynsha qosymsha sharalar qabyldaýdy talap etedi.
VAK otyrysynyń jumysyna Qazaqstan Respýblıkasy Parlamenti Senatynyń depýtaty, Qazaqstan Respýblıkasynyń Bala quqyqtary jónindegi ýákil Sáýle Muhamendııanqyzy Aıtpaeva, ortalyq memlekettik jáne jergilikti atqarýshy organdardyń basshylary, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa hatshylyǵynyń, Adam quqyqtary jónindegi ulttyq ortalyqtyń jáne úkimettik emes uıymdardyń ókilderi qatysty.
VAK otyrysynyń qorytyndysy boıynsha kámeletke tolmaǵandar arasyndaǵy quqyq buzýshylyqtardyń profılaktıkasy boıynsha ortalyq jáne jergilikti atqarýshy organdardyń qyzmetin kúsheıtýge baǵyttalǵan usynystar ázirlenetin bolady.
