Birqatar óńirde turǵyn úı qurylysyna jer telimderiniń tapshylyǵy baıqalyp otyr
ASTANA. 14 mamyr. QazAqparat - Birqatar óńirde turǵyn úı qurylysyna jer ýchaskeleriniń tapshylyǵy baıqalady.
Bul týraly búgin Úkimet otyrysynda «Qoljetimdi baspana-2020» baǵdarlamasyn iske asyrý barysy týraly baıandama jasaǵan QR Óńirlik damý vıtse-mınıstri Serik Nokın málim etti.
«Qazaqstandyq turǵyn úı qurylys korporatsııasy, «Samuryq Qazyna» jyljymaıtyn múlik qory, sondaı-aq turǵyn úı qurylysynyń basqa da baǵyttarymen jumys isteý barysynda birqatar óńirlerde turǵyn úı qurylysyna jer ýchaskeleriniń tapshylyǵy baıqaldy»,-dedi S. Nokın.
Onyń atap ótýinshe, oryn alyp otyrǵan ahýaldy oń sheshý úshin Úkimettiń tapsyrmasyna sáıkes oblys ákimdikterimen 2012-2015 jyldarǵa arnalǵan qalalar men aýyldyq eldi mekenderdiń bas josparlaryn, detaldy josparlaý jobalaryn jáne qurylys jobalaryn ázirleý kestesi bekitilgen. Bul rette Astana men Almaty qalalary, barlyq oblys ortalyqtary jáne halyq sany 100 myńnan asatyn qalalardyń bas josparlary bar ekendigi eskerilip, atalǵan kestege halyq sany 100 myńǵa deıingi qalalar men eldi mekenderdiń qurylys jobalary qosylǵan.
«Osy kestege sáıkes respýblıka boıynsha atalǵan kezeńde 23 qalanyń bas jospary, 76 detaldy josparlaý jobasy, 26 qurylys jobasy, halyq sany 50 myńǵa deıingi 149 qalanyń detaldy josparlaý jobalaryn qosa alǵandaǵy bas jospar, 982 5 myńǵa deıingi turǵyndary bar aýyldyq eldi mekenderdiń bas josparynyń jeńildetilgen syzbasy ázirlenetin bolady»,-dedi ol.
