Birqatar óńirde muǵalimderge jańa páter kiltteri tabystaldy

NUR-SULTAN. QazAqparat - Táýelsizdik kúni bilim berý salasynyń qyzmetkerlerine jańa páterlerdiń kiltteri tabystaldy. Bul týraly Bilim jáne ǵylym mınıstrliginiń baspasóz qyzmetinen málim boldy, dep habarlaıdy QazAqparat.

18 jyldyq tájirıbesi bar oqytýshy, kópbalaly ana Laýra Ótepbergenova da endi Nur-Sultan qalasyndaǵy jańa páterdiń ıesi atandy.

«Muǵalimder men oqytýshylardy umytpaǵandary úshin alǵys aıtamyn. Biz bul kúndi asyǵa kúttik. Páter óte jyly, yńǵaıly», - dedi oqytýshy Laýra Ótepbergenova.

Úsh balanyń anasy Baǵıla Ydyrysova da elordadaǵy jańa páterdiń kiltin aldy. Páterdiń kiltin tapsyratyny týraly habarlaǵan kezde qatty qýanǵanyn jasyrmady.

Pedagogtar turǵyn úıdi «Nurly jer» memlekettik baǵdarlamasy jáne Bilim jáne ǵylym mınıstrligi men «Qazaqstan Ipotekalyq Kompanııa» AQ arasyndaǵy memorandým aıasynda aldy.

«Búgin elimizdiń eń basty merekesi –Táýelsizdik kúni bizdiń pedagogtarymyz jańa páterlerdiń kiltterin alýda. Aqtóbe, Aqtaý, Almaty, Qaraǵandy qalalarynda da shamamen eki júzden astam pedagog páterge ıe boldy. Biz osy mereke kúni áriptesterimizdiń jańa páterlerge ornalasqanyna óte qýanyshtymyz. Árıne, endi bizdiń áriptesterimiz turǵyn úı máselelerine alańdamaıtyn bolady. Bul – barshamyz úshin úlken qýanysh», - dedi Bilim jáne ǵylym vıtse-mınıstri Sholpan Karınova.