Birqatar óńirde mektep oqýshylaryna oqýlyqtar jetispeýde
ASTANA. QazAqparat - Birqatar óńirde mektep oqýshylaryna oqýlyqtar jetispeýde. Bul týraly búgin elordada ótken brıfıngte QR Bilim jáne ǵylym mınıstrligi Mektepke deıingi, orta bilim jáne aqparattyq tehnologııalar departamentiniń dırektory Jańyl Jontaeva málim etti.
«Búgingi kúni bizderde oqýlyqtarmen tolyq qamtamasyz etilgen oblystar bar. Olar: Aqtóbe, Almaty, Atyraý, Jambyl, Qaraǵandy, Mańǵystaý, Pavlodar, Ońtústik Qazaqstan oblystary men Astana jáne Almaty qalalary», - dedi ol.
Degenmen, departament basshysynyń atap ótýinshe, birneshe oblystyń, ásirese, aýdandyq bilim bólimderiniń oqýlyqtardy tolyq jetizbegendigi monıtorıng arqyly anyqtalǵan.
«Aqmola oblysynda Sandyqtaý, Jaqsy, Shortandy aýdandary men Stepnogor qalasynda, Shyǵys Qazaqstan oblysynda Tarbaǵataı, Ulan aýdandary men Óskemen qalasynda, Qostanaı oblysynda Jetiqara aýdany men Lısakov qalasynda, Soltústik Qazaqstan oblysynda Aqqaıyń, Aıyrtaý, Shal aqyn, Ǵabıt Músirepov, Jambyl, Aqjar, Maǵjan Jumabaev aýdandary men Petropavlda jáne Qyzylorda qalasynda oqýlyqtar jetispeıdi», - dedi J.Jontaeva.
