Birqatar oblystardaǵy jol salýǵa jańa «Slarrı Sıl» túri qoldanylady - Kólik mınıstrligi
ASTANA. 20 maýsym. QazAqparat - QR Kólik jáne kommýnıkatsııa mınıstrligi elimizdiń birqatar oblystaryndaǵy jol qurylysyna jol jabyndysynyń jańa «Slarrı Sıl» túrin pılottyq tártipte qoldanýdy josparlap otyr.
Jańa tehnologııa bıyl Almaty, Aqtóbe jáne Atyraý oblystarynda qoldanylady dep josparlanýda. Jalpy synaqtyq tártipte qoldanylatyn jańa jabyndynyń jalpy uzyndyǵy 38,4 shaqyrymdy quraıdy. Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.
Mınıstrlik «Slarrı sıl» tehnologııasyn jol jabyndysynyń qorǵanys qabaty qurylǵysyna balamaly ádis retinde synamalyq negizde qoldanbaq. Qorǵanystyń bul túri emýlsııalyq-mıneraldyq qospa ispetti, ol jol jabyndysynyń uzaq saqtalý qasıetin arttyrady.
Budan basqa, «Slarrı Sıl» qabaty jol qurylysyn tabıǵat faktorlarynyń teris áserinen saqtaı otyryp, onyń qoldanys sapasyn arttyrady. Qabattyń qalyńdyǵy 5 mm-den 15 mm-ge deıin. Buǵan qosa jabyndynyń bul túrin óte qysqa merzimde tóseýge bolady jáne tóseý barysynda qorshaǵan ortaǵa tıgizer ekologııalyq áseri tómen. «Slarrı Sıl» balama tósemeleri Túrkııa, Reseı jáne Germanııa elderinde qoldanylyp keledi.
Toqtala ketetin jaıt, Qazaqstanda búgingi kúni jol jabyndysyn tozýdan saqtaý úshin negizinen qıyrshyq mastıkalyq negizdeme ádisi qoldanylady. Aldymen bıtým tóseledi, odan soń 5-20 mm deńgeıinde qıyrshyq tas tóseledi. Bul ádistiń eń negizgi jetispeýshiligi jumys barysyndaǵy shýyl deńgeıiniń joǵarylyǵy, qıyrshyq tastyń kólik dóńgeleginen syrtqa laqtyrylýy jáne paıdalaný merziminiń qysqalyǵy. Budan basqa, avtomobıl kólikterin jyl saıyn tekserý nátıjesi kórsetkendeı, sońǵy ýaqytta aýyr júk kólikteriniń sany men kólikterdiń júrý jyldamdyǵy artqan saıyn jol jabyndysynyń merziminen buryn tozýy jıi kórinis berýde.
