Birqatar oblystarda egistik jerler ne úshin qysqarǵany túsindirildi
ASTANA. QazAqparat - Búgin Parlament Májilisinde aýyl sharýashylyǵy jerlerin tıimdi paıdalaný taqyrybynda ótken dóńgelek ústelde Aýyl sharýashylyǵy vıtse-mınıstri Erlan Nysanbaev elimizde egistik alqaptary negi qysqarǵanyn túsindirdi, dep habarlaıdy QazAqparat.
«Jer qoryna jasalǵan taldaýǵa súıensek, jyl saıyn egistik jerdiń aınalymǵa shyǵarylýy artýyna qaramastan, sońǵy 25 jylda egindik jerdiń aýdany 10 mln 600 myń gektarǵa qysqarǵany baıqalady. Sonymen birge alqaptyń qysqarýynyń negizgi kezeńi 1991-2000 jyldarǵa tıesili. 2000 jyldan bastap egistik jer jyl saıyn 24 mln gektar deńgeıinde», - dedi Erlan Nysanbaev.
Onyń atap ótýinshe, búginde egis alqaptarynyń negizgi úlesi Qostanaı, Aqmola, Soltústik Qazaqstan oblystarynda shoǵyrlanǵan.
Egistik jerlerdiń qysqarýynyń eleýli kórsetkishi Pavlodar, Aqtóbe, Batys Qazaqstan, Shyǵys Qazaqstan jáne Qaraǵandy oblystarynda baıqaldy.
Atap aıtqanda, aýyl sharýashylyǵy jerine tıesili egistiktiń qysqarýy myna sebepter boıynsha oryn aldy: birinshiden, jer reformasynyń bastapqy kezeńinde sharýashylyq sýbektileriniń ekonomıkalyq jaǵdaılaryna baılanysty egistikterdi qordaǵy (zapastaǵy) jerler sanatyna engizilýi nátıjesinde, sondaı-aq reformalanǵan aýyl sharýashylyǵy kásiporyndarda jerdi paıdalanbaý saldarynan; ekinshiden, aýyl sharýashylyǵy maqsatyndaǵy tyńaıǵan jerler aýmaǵynyń keńeıtilýine jáne sýarmaly jerlerde sýlandyrý júıesiniń joqtyǵan baılanysty; úshinshiden, egin salynatyn jerlerdi aýyl sharýashylyǵy alqaptarynyń basqa túrlerine aýystyrylýyna qatysty.
Munymen qosa, E. Nysanbaev topyraq qunarlyǵynyń tómendeýine mıneraldy ári organıkalyq tyńaıtqyshtardyń tıisti deńgeıde sebilmeýi, agrotehnıkalyq sharalardyń durys oryndalmaýy yqpal etkenin atap ótti.
