Birqatar oblystar sý jınaqtaý jumystaryn nashar júrgizgen - Saǵyntaev
ASTANA. QazAqparat - Birqatar oblystar sý jınaqtaý jumystaryn nashar júrgizgen. Bul týraly búgin Úkimet otyrysynda Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.
"Aqmola, Almaty, Qaraǵandy, Qostanaı jáne Túrkistan oblystary sýdy jınaqtaý josparyn oryndaý boıynsha jumystardy nashar júrgizgen. Jospardaǵy is-sharalardy oryndaý úshin barlyq jumystar jasalýy qajet. Ómirzaq Estaıuly baqylaý sizde", - dedi Baqytjan Saǵyntaev orynbasary ári Aýyl sharýashylyǵy mınıstri Shókeevke qarata.
Osy rette Premer-Mınıstr sýdy jınaqtaý josparyn oryndaý kezinde onyń agroónerkásiptik keshendi damytý baǵdarlamasymen biriktirilgendigin eskerý qajettigin aıtty.
"Ulttyq ekonomıka, Qarjy mınıstrlikteri Aýyl sharýashylyǵy mınıstrligimen jáne oblystardyń ákimdikterimen birlesip, aǵymdaǵy jyldyń 20 aqpanyna deıin jańa sý qoımalaryn salý jáne shaǵyn sý qoımalaryn jańǵyrtýǵa tehnıkalyq-ekonomıkalyq negizdemelerdi qarjylandyrý máselesin qarastyratyn bolsyn", - degen Úkimet basshysy bul máseleni de Shókeevke baqylaýǵa alýdy tapsyrdy.
