Birqatar oblystar men Astana mańyndaǵy eldi mekenderde sý basý qaýpi ýshyǵyp otyr - V. Bojko
ASTANA. QazAqparat - Qazaqstannyń birqatar oblystaryndaǵy jáne Astana qalasynyń mańyndaǵy eldi mekenderde sý basý qaýpi artyp otyr.
Bul týraly búgin Astanada ótken baspasóz máslıhaty barysynda Іshki ister mınıstriniń orynbasary Vladımır Bojko málim etti.
Mınıstr orynbasarynyń sózine qaraǵanda, sý tasqynynyń alǵashqy qaýipteri alǵash ret 23 - 29 naýryzda kúnniń kúrt jylýynan Shyǵys Qazaqstan oblysynyń Semeı men Aıagóz óńirlerinde jáne Qaraǵandy oblysynyń Jańaarqa, Qarqaraly, Shet, Ulytaý aýdandarynda tirkelgen.
«Kóktemgi qar erý bastalǵaly beri sý basý qaýpi týyndaǵan aýmaqtarynda Aqmola, Qaraǵandy, Qostanaı, Shyǵys Qazaqstan, Pavlodar, Soltústik Qazaqstan oblystarynyń 17 aýdandarynda 50 eldi meken men 1 149 úı qalyp otyr. 511 úıdi sý basty. Sý tasqyny 17,3 shaqyrym avtojoldardy shaıyp ketse, olardyń tek 1,9 shaqyrymy ǵana qalpyna keltirildi. Tasqyn sý 5 kópirdi qıratyp ketti», - deıdi V. Bojko.
Onyń sózine qaraǵanda, 12 sáýirden bastap sý basý qaýpi odan saıyn kúsheıip otyr. Buǵan negizinen Qaraǵandy jáne Aqmola oblystarynan ótetin Nura ózenine Sherýbaı-Nura men Samarqand sý qoımalarynan sýdyń kóp mólsherde quıylýy sebep bolǵan sekildi. Atap aıtqanda, Nuraǵa quıylǵan sý sekýndyna shamamen 2 300 tekshemetrge jetken.
«Sondyqtan da, Qaraǵandy oblysynyń ózinde taǵy da 20 eldi meken qaýipti aımaqta bolsa, sonyń ishinde 5 eldi meken tolyǵymen sý astynda qalý qaýpinde. Sý tasqynyna Nura ózenine jaqyn Aqmola oblysynyń birqatar eldi mekenderi men Astana qalasynyń mańyndaǵy eldi mekender de qalýy múmkin. Soltústik Qazaqstan jáne Pavlodar oblystarynyń eldi mekenderine de Sileti ózeninen qaýip týyp tur», - dedi V. Bojko.
Astanany sý basý qaýpi týrasyn naqtylaý barysynda mınıstr orynbasary Memleket basshysynyń tikeleı tapsyrmasy boıynsha áýejaı mańynda bóget salynǵanyn, bul qalany kez kelgen sý tasqynynan qorǵaı alatynyn málimdedi.
