Birqatar oblys ortalyǵyna «Sergek» kameralary ornatylady
ASTANA. QazAqparat - Qazaqstannyń birqatar oblys ortalyǵyna «Sergek» kameralary ornatylady. Bul týraly búgin Úkimettiń selektorlyq rejimdegi otyrysynda QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Qazirgi ýaqytta Astanada 400 jol qıylysyn jáne 300 jol ýchaskesin «Sergek» júıesimen jabdyqtaý bastaldy. Jyldyń basynan bastap osy «Sergek» arqyly 260 myń ákimshilik quqyq buzýshylyq anyqtaldy. Bıýdjetke 740 mln teńgeden astam aıyppul óndirildi. Nátıjesinde Astana qalasyndaǵy jol-kólik oqıǵalarynyń sany 20, qaza bolǵandardyń sany 50 jáne jaraqat alǵandardyń sany 23 paıyzǵa azaıdy. Osyndaı jobany Aqtóbe, Atyraý, Pavlodar, Batys Qazaqstan, Shyǵys Qazaqstan oblystarynda júzege asyrý josparlanǵan», - dedi ol.
Mınıstrdiń dereginshe, aǵymdaǵy jyly ótken jylmen salystyrǵanda jol apaty kórsetkishi tómendep, 9670 oqıǵa tirkelgen. Apat saldarynan 12562 adam jaraqat alǵan. Jyldyń basynan beri avtomobıl apatynan 1251 adam qaza bolǵan.
«Jol-kólik oqıǵalarynyń negizgi sebebi - júrgizýshiler tártibiniń tómen bolýy. Barlyq kólik oqıǵalarynyń 70 paıyzǵa jýyǵy júrgizýshilerdiń jol erejesin buzýymen baılanysty oryn alady. Tek osy jyly ǵana 2,2 mıllıonnan astam jol erejesin buzý faktileri tirkeldi. Onyń kóbi fotofıksatsııa kómegimen anyqtaldy. Bıýdjetke 8,9 mlrd teńgeden astam somaǵa aıyppul óndirildi. 18 myń mas júrgizýshi ustaldy. 26 myń adam kólik basqarý quqyǵynan aıryldy. 2,2 myń adam ákimshilik qamaýǵa alyndy», - dedi Qalmuhanbet Qasymov.
