Birqatar oblys Ónimdi jumyspen qamtýǵa bólingen qarjyny «Damý» qoryna aýdarmaı otyr

ASTANA. QazAqparat - Birqatar oblys Ónimdi jumyspen qamtý baǵdarlamasyna bólingen qarjyny «Damý» qoryna aýdarmaı otyr.  Bul týraly búgin Úkimettiń selektorlyq rejimdegi otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Ulttyq ekonomıka mınıstrligine kásipkerlik qyzmetti shaǵyn nesıeleýdi úılestirý, qalalardaǵy kásipkerlerdi shaǵyn nesıeleýdi kepildendirý, sondaı-aq 2017 jyly aýyldyq eldi mekenderdegi jumyssyz jáne ózin ózi eńbekpen qamtyǵan turǵyndardy oqytý jónindegi «Bastaý bıznes» jobasyn júzege asyrý bekitilgen. Shaǵyn nesıeler 18 mln teńge deıin 5 jyl merzimge sońǵy syıaqy mólsherlemesimen beriledi. 2017 jyly qalalarda kásipkerlik qyzmetti shaǵyn nesıeleýge 10 mlrd teńge, onyń ishinde 3 mlrd teńgesi respýblıkalyq bıýdjettiń maqsatty transfertteri esebinen jáne 7 mlrd teńgesi jalpy sıpattaǵy transfertter esebinen bólindi. Atalǵan qarjy jergilikti atqarýshy organdar arqyly ákimshilendiriledi. Jalpy sıpattaǵy transfertter aıasyndaǵy qarjyǵa 1 qańtardan bastap qol jetkizýge bolatynyn atap ótpekpiz», - dedi Tımýr Súleımenov.

Onyń aıtýynsha, respýblıkalyq bıýdjetten qarjylandyrylatyn qarajat boıynsha QR Úkimetiniń 2017 jylǵy 31 naýryzdaǵy sheshimine sáıkes bıýdjettik nesıeleý sharty belgilendi. Aǵymdaǵy jylǵy sáýirde Ulttyq ekonomıka, Qarjy mınıstrlikteri jáne jergilikti atqarýshy organdar arasynda úshjaqty nesıe kelisimine qol qoıyldy. Respýblıkalyq bıýdjetten bólingen qarjy «Damý» kásipkerlikti damytý qoryna 2017 jylǵy mamyrda aýdaryldy.

«Jergilikti atqarýshy organdar tarapynan 7 mlrd teńge kólemindegi jalpy sıpattaǵy transfertterdiń búginde 5,4 mlrd teńgesi aýdarylǵan. Belgilengen lımıtterdi birqatar oblystar oryndamaı otyr», - dedi ol.

Súleımenovtiń atap ótýinshe, qorǵa belgilengen qarjyny áli kúnge aýdarmaı otyrǵan oblystar bul jumystardy jedeldetýi qajet.