Birqatar oblys ákimderi «Aqparatqa qol jetkizý týraly» zańdy buzyp otyr - Áshimbaev

ASTANA. QazAqparat - Birqatar oblystyń ákimderi «Aqparatqa qol jetkiz týraly» zań talaptaryn buzyp otyr. Bul týraly búgin «100 naqty qadam» Ult josparynyń 94, 95 jáne 96-qadamdaryn oryndaý aıasynda «Aqparatqa qol jetkiz týraly» QR Zańynyń iske asyrylý barysyna arnalǵan dóńgelek ústel otyrysynda Májilis depýtaty Máýlen Áshimbaev aıtty, dep habarlaıdy QazAqparat.

«Dóńgelek ústelimizdiń aldynda birqatar úkimettik emes uıym ózderiniń bastamasymen memlekettik organdardyń suraý salýǵa qalaı jaýap beretindigine zertteýler júrgizipti. Olar 12  oblystyń ákimderine e-Gov portalyndaǵy blogtary arqyly suraý salý jibergen. Al qalǵan ákimderdiń e-Gov portalynda blogtary joq eken. Osy rette olardyń blogtary áli kúnge deıin nege joq degen saýal týyndaıdy», - dep atap ótti ol.

Onyń aıtýynsha, suraý salý jiberilgen 12 oblystyń tek tórteýi ǵana zańǵa sáıkes jaýap qaıtarǵan.

«Osylaısha oblystardyń 70 protsenti suraý salýǵa jaýap bermegen. Olar aqparatqa qoljetimdilik týraly zańǵa sáıkes málimetterdi usynýy tıis edi. Bizdiń zańnamamyzda jaýapkershilik kórsetilgen. Ony ákimshilik quqyq buzýshylyq týraly kodekske engizgen bolatynbyz. Munan bólek, suraý salý 15 mınıstrlikke jiberilgen. Ol jaqta jaǵdaı birshama jaqsy. 70 protsent jaýap qaıtarǵan. Degenmen, 30 protsenttiń aqparatqa qoljetimdilik týraly zań talaptaryn buzýy da az kórsetkish emes», - dep atap ótti Máýlen Áshimbaev. 

Osy rette Májilis depýtaty memlekettik organdardyń ashyqtyǵy qoǵamdyq reıtıngin qurýǵa bolatyndyǵyn basa aıtty.

«Basqa elderdiń úkimettik emes uıymdarynyń jyl saıyn óz erkimen zertteý júrgizip, qoǵamdyq reıtıng túzetin  tájirıbesin qarap kórý kerek. Bul reıtıngti jyl saıyn jarııalap otyrýǵa bolady. Kósh basyndaǵylardy yntalandyratyn syıaqy qarastyrǵan jón bolar edi. Al aýtsaıderlerdi tek qana synaıtyn bolamyz», - dedi M. Áshimbaev.