Birqatar mańǵystaýlyqtar merekelik medalmen marapattaldy

Memleket basyshysy N.Á.Nazarbaev bıylǵy halyqqa arnaǵan joldaýynda: «2018 jyl - Elordamyz Astananyń 20 jyldyǵyn atap ótetin mereıtoıly jyl. Bas qalamyzdyń qalyptasýy jáne Eýrazııanyń mańyzdy damý ortalyqtarynyń qataryna qosylýy - barshamyzdyń ortaq qýanyshymyz» degen bolatyn. Rasynda bul tek Elordanyń ǵana emes, tutas Qazaq eliniń merekesi, halqymyzdyń qýanyshy.

Saltanatty sharada oblys ákimi Eraly Toǵjanov Mańǵystaý halqyn merekemen quttyqtap, el ıgiligi úshin eńbek etip júrgen bir top qyzmetkerlerdi Astana qalasynyń 20 jyldyǵyna oraı alǵys hatpen marapattady. Dálirek aıtsaq, Qazaqstan Respýblıkasynyń jáne Astana qalasynyń qalyptasýy men damýyna qosqan eleýli úlesi úshin Qazaqstan Respýblıkasy Prezıdentiniń 2018 jylǵy 20 maýsymdaǵy № 706 Jarlyǵy boıynsha bir top azamat «Astana 20 jyl» merekelik medalimen nagradtaldy.

«Prezıdentimiz Astanany álemdegi birliktiń sımvolyna  aınaldyrdy. Búginde Elbasymyz ben Elordamyz egiz uǵym. Táýelsizdik jyldary qol jetkizgen jetistikterimizdiń bári bas qalamyzdan bastaý alady. Beıbitshilik pen tatýlyqtyń, birlik pen berekeniń ordasyna aınalǵan Astana arqyly búkil álem táýelsiz Qazaq elin tanydy. Dúnıejúzine Elbasymyz Nursultan Ábishulynyń esimin moıyndatty. Osynyń barlyǵy elimizdegi turaqtylyqtyń, halqymyzdyń Elbasymyzǵa degen úlken senimi men qoldaýynyń nátıjesi dep bilemin. Uly Eýrazııa kindigi - Saryarqanyń tórinde kótergen  shańyraǵymyz  qutty   bolyp,  qysqa ǵana ýaqyttyń ishinde  Astana  - Otanymyzdyń júregi, halqymyzdyń maqtanyshy, rýhanı  órleýimizdiń, ekonomıkalyq damýymyzdyń  qozǵaýshy  kúshine ıe boldy», - dedi óńir basshysy Eraly Luqpanuly.  

«Astana 20 jyl» medalimen marapattalǵandar qatarynda Uly Otan soǵysynyń jáne eńbek ardagerleri, memleket jáne qoǵam qaıratkerleri, oblystaǵy birqatar ardagerler keńesteriniń tóraǵalary, taǵy da basqa eleýli azamattar bar. 

Saltanatty jıyn sońy kontserttik baǵdarlamaǵa ulasty.