Birqatar qurylys materıaldary boıynsha ımportty 100% ishki ónimge almastyramyz – mınıstr

NUR-SULTAN. QazAqparat – Elimizde keıbir qurylys materıaldary boıynsha ımportty 100 paıyz otandyq ónimge almastyrý josparlanyp otyr. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev málim etti, dep habarlaıdy QazAqparat tilshisi.

«Qurylys materıaldary óndirisinde 24 jobany iske asyrý kózdelip otyr. Atalǵan shara ımportty 890 mln. AQSh dollaryna almastyrýǵa jáne eksport kólemin 206 mln. AQSh dollaryna arttyrýǵa múmkindik beredi. Sondaı-aq, keramıkalyq plıtalar, avtoklavty gazobloktar, jylý oqshaýlaǵysh materıaldar, sendvıch-panelder sııaqty qurylys taýarlary boıynsha ımportty 100% almastyrý josparlanyp otyr», - dedi Qaıyrbek Óskenbaev Ortalyq kommýnıkatsııalar qyzmeti alańynda ótken baspasóz máslıhatynda.

Mınıstrdiń aıtýynsha, ındýstrııalyq jobalardy iske asyrý ımportty almastyrýmen qatar, jańa jumys oryndaryn ashýǵa da múmkindik beredi.

«Jalpy elimiz boıynsha 131 ındýstrııalyq jobany iske asyrý josparlandy. Bul 38 myń jumys ornyn qurýǵa, sol sekildi 4 mlrd. AQSh dollaryna ımportty almastyrýǵa jáne shıkizattyq emes eksportty 9 mlrd. AQSh dollaryna arttyrýǵa múmkindik beredi. Qurylys materıaldarymen qosa, birqatar hımııa ónerkásibi ımportyn tolyqtaı otandyq ónimge almastyrý josparlanyp otyr», - deıdi Q. Óskenbaev.

Buǵan deıin mınıstr óńdeý ónerkásibi salasynda júzege asyrylatyn ındýstrııalyq jobalardyń pýly jasaqtalǵanyn aıtqan bolatyn.