Birqatar konstıtýtsııalyq zańdarǵa ózgerister engiziledi - Májilis
ASTANA. QazAqparat - Búgin Palata Spıkeri Nurlan Nyǵmatýlınniń tóraǵalyǵymen ótken jalpy otyrysta Májilis «Qazaqstan Respýblıkasynyń keıbir konstıtýtsııalyq zańdaryna ózgerister engizý týraly» zań jobasyn birinshi oqylymda maquldady.
Atap aıtqanda, zań jobasymen «Qazaqstan Respýblıkasyndaǵy saılaý týraly», «QR Parlamenti jáne onyń depýtattarynyń mártebesi týraly», «QR Konstıtýtsııalyq Keńesi týraly», «QR Tuńǵysh Prezıdenti - Elbasy týraly» jáne «QR sot júıesi men sýdıalarynyń mártebesi týraly» konstıtýtsııalyq zańdardy Qylmystyq is júrgizý kodeksiniń jobasyna sáıkes keltirýge baǵyttalady. «Usynylǵan ózgerister atalǵan konstıtýtsııalyq zańdardy qoldanýda quqyqtyq qaıshylyqtar men olqylyqtardyń oryn almaýyn qamtamasyz etedi. Zań jobasy qoldaý tapsa azamattardyń quqyqtary men bostandyqtaryn, qoǵam men memlekettiń múddelerin qylmystyq qolsuǵýshylyqtan tıimdi qorǵaý qamtamasyz etiledi», - deıdi Májilis depýtaty Ramazan Sárpekov. Onyń aıtýynsha, zań jobasy zańdylyq, demokratııalyq jáne bılikti bólý qaǵıdatyna nuqsan keltirmeıdi.
