Birqatar qalalarda tergeý ızolıatorlary qurylysynyń jobalaý-smetalyq qujattamalaryn ázirleýge bólingen qarjyny jymqyrǵandar jazasyn aldy
TANA. 18 tamyz. QazAqparat /Rýslan Ǵabbasov/ - Oral, Semeı, Óskemen qalalarynda tergeý ızolıatorlary qurylysynyń jobalaý-smetalyq qujattamalaryn ázirleýge bólingen 300 mln. teńge bıýdjet qarajatyn urlaý faktisi boıynsha qylmystyq istiń sotta qaralýy aıaqtaldy.
Bul týraly búgin Astanada ótken brıfıngte Bas prokýratýranyń resmı ókili Jandos Ómirálıev málim etti.
«Tergeý anyqtaǵandaı, Qylmystyq-atqarý júıesi komıteti tóraǵasynyń burynǵy orynbasary Qaıyrbolat Esqalıev, sondaı-aq qarjy-ekonomıkalyq basqarmasynyń burynǵy bastyǵy Batyrhan Súttiǵojanov jáne resýrstyq qamtamasyz etýdi basqarý bóliminiń burynǵy bastyǵy Vıacheslav Tsıkýnov ózderiniń qyzmettik ókilettiligin teris paıdalanyp, memlekettik qyzmet múddelerine qaıshy kele otyryp, «Astana Joba Qurylys» JShS-niń paıdasyna birqatar zańsyz sheshimder qabyldaǵan»,-dedi resmı ókil.
Onyń sózine qaraǵanda, atalǵan laýazymdy tulǵalar ózderiniń qylmystyq teris áreketterin jalǵastyra otyryp, ózderine vedomstvolyq baǵynystaǵy mekemelerdiń basshylaryna oryndalmaǵan jumys túrleri úshin jalǵan aktilerge qol qoıý týraly zańsyz tapsyrmalar bergen. Osy aktiler negizinde «Astana Joba Qurylys» JShS-na oryndalmaǵan jumystary úshin qomaqty bıýdjet qarajaty aýdarylǵan.
«Bıylǵy 3 tamyzda Astana qalasy Saryarqa aýdandyq sotynyń úkimimen atalǵan qylmystardy jasaǵany úshin Q. Esqalıevke 1 jyl 6 aıǵa bas bostandyǵynan aıyrý jazasy berildi»,-dedi J. Ómirálıev. Sonymen qatar B. Súttiǵojanov 2 jyl 6 aıǵa, V. Tsıkýnov 2 jylǵa sottaldy. Іri mólsherde ózgeniń múlkin urlaǵany úshin «Astana Joba Qurylys» JShS-niń basshysy Erlan Bekqoja 5 jylǵa bas bostandyǵynan aıyryldy.
