Birqatar elderdiń ekologııa mınıstrleri elordany kógaldandyrý sharasyna qatysty
ASTANA. Qyrkúıektiń 29-y. QazAqparat /Rýslan Ǵabbasov/ - Búgin Azııa jáne Tynyq muhıty óńirindegi elderdiń qorshaǵan ortany qorǵaý mınıstrleri Astanadaǵy «Atameken» Qazaqstan kartasy» - etno-memorıaldyq kesheni mańyndaǵy ekologtar saıajolynda shyrshalar otyrǵyzdy.
Aıta keteıik, Táýelsizdik saraıynda Qorshaǵan ortany qorǵaý mınıstrleriniń altynshy konferentsııasy aıasynda Laýazymdy tulǵalar otyrysynyń jumysy ótip jatyr. Konferentsııa jumysy eki segmentten turady. Laýazymdy tulǵalar otyrysy qyrkúıektiń 27-si men 29-y aralyǵynda, al Qorshaǵan ortany qorǵaý mınıstrleriniń altynshy konferentsııasynyń mınıstrler segmenti otyrysy qazannyń 1-i men 2-si aralyǵynda ótedi.
Atalǵan saıajolda jalpy 30-ǵa jýyq aǵash otyrǵyzyldy. Uıymdastyrýshylardyń aıtýynsha, bundaı aktsııa endi dástúrli túrde ótkizilip turmaq. «Búgin biz ESKATO (BUU-nyń Azııa jáne Tynyq muhıty óńiri boıynsha ekonomıkalyq jáne áleýmettik komıssııasy) altynshy konferentsııasyn ótkizý aldynda estelik retinde alty jyl ósirilgen shyrshalardy otyrǵyzdyq. Aldaǵy jyly álemde alǵash ret Astanada eýropalyq elder ekologtarynyń konferentsııasy ótedi. Atap aıtqanda, osyndaı ıgi sharalar arqyly bul saıajol odan ári kórkeıetinine úmittimin»,-dedi QR Qorshaǵan ortany qorǵaý mınıstri Nurǵalı Áshimov.
Búgingi shara barysynda mınıstr Elbasynyń tapsyrmasy boıynsha 11 jyldyń ishinde elordada jáne qala mańynda 50 myń gektar jerge aǵash otyrǵyzylǵanyn aıtyp ótti. «Jalpy elimiz boıynsha 500 myń gektar alqapqa aǵashtar men jasyl jelek egildi»,-dedi N. Áshimov.
