Birqatar elderde halyq koronavırýs vaktsınasynyń úshinshi dozasyn alyp jatyr

NUR-SULTAN. QazAqparat – Koronavırýs ınfektsııasynyń alańdatarlyq statıstıkasy halyqqa vaktsınanyń úshinshi dozasyn alýdy usynady. Bul týraly, atap aıtqanda, Germanııanyń 16 federaldy shtatynyń densaýlyq saqtaý mınıstrleri kelisti, dep habarlaıdy QazAqparat Euronews agenttigine silteme jasap.

Sondaı-aq, vaktsınatsııa baǵdarlamasyna 12 jastan 17 jasqa deıingi turǵyndardy engizý týraly sheshim qabyldandy.

Qazirgi ýaqytta Germanııada halyqtyń 52%-dan astamy eki ekpeden aldy.

Izraılde bes aı buryn egilgen 60 jastan asqan azamattardy qosymsha vaktsınalaý kampanııasy júrip jatyr.

Prezıdent Itshak Gertsog alǵashqylardyń biri bolyp «Pfaızer» amerıkalyq kompanııasy preparatynyń úshinshi dozasyn aldy.

Eldiń densaýlyq saqtaý mınıstrliginiń málimetinshe, búginde elde koronavırýs juqtyrǵandardyń 40% — balalar men jasóspirimder.

Sonymen qatar, vaktsınatsııa men shekteý sharalaryna qarsy halyqtyń bir bóliginiń narazylyǵy da artyp keledi.

Polshada belgisiz bireýler Zamosts qalasyndaǵy vaktsınatsııa pýnkti men epıdemıologııalyq stantsııany órtep jibergen.

Polsha bıligi bul oqıǵany terrorızm aktisi dep atady.

Densaýlyq saqtaý mınıstri Adam Nıjelskıı: «Bul áreketter tek jergilikti medıtsına qyzmetkerlerine ǵana emes, bul terrorızm aktisi memleketke qarsy baǵyttalǵan», - dep málimdedi.

Sońǵy kezderi agressııanyń mundaı kórinisteri jıilep ketti.

Demalys kúnderi Gdynıa qalasynda vaktsınatsııaǵa qarsy top mobıldi vaktsınatsııa pýnktine shabýyl jasady.

Áleýmettik saýalnama kórsetkendeı, Polsha turǵyndarynyń tórtten bir bóligi vaktsınalanǵysy kelmeıdi nemese ekpeniń tıimdiligine áli de kúmánmen qaraıdy.