Birqatar ekinshi deńgeıli bankterdiń aqparattyq júıelerimen biriktirý júrgizildi - Almat Madalıev

NUR-SULTAN. QazAqparat – Búginde sot oryndaýshylary boryshkerdiń múlki týraly aqparatty memlekettik organdardyń 52 bazasynan alady. Bul týraly Ádilet vıtse-mınıstri Almat Madalıev málim etti, dep habarlaıdy QazAqparat tilshisi.

«Sońǵy birneshe jyl ishinde sot oryndaýshylarynyń qyzmeti aıtarlyqtaı mobıldi jáne sapaly boldy. Buǵan Ult josparynyń 27-shi qadamyn oryndaý aıasyndaǵy jemisti jumys, buryn josparlanǵan reformalardy júzege asyrý yqpal etti. Búgingi tańda atqarýshylyq qujattardyń edáýir bóligi jeke negizde oryndalýda. Oń nátıjeler avtomattandyrylǵan aqparattyq júıeniń damýymen, sot oryndaýshylarǵa memlekettik organdardyń aqparattyq resýrstaryna ońaı qoljetimdilik pen olardyń is júrgizý áreketterin avtomattandyrýmen baılanysty», - dep toqtaldy vıtse-mınıstr vedomstvonyń keńeıtilgen alqa májilisinde.

Onyń sózine qaraǵanda, birqatar ekinshi deńgeıli bankterdiń aqparattyq júıelerimen biriktirý júrgizildi (jıyrma jeti bankten on tórt bank). Búginde sot oryndaýshylary boryshkerdiń múlki týraly aqparatty memlekettik organdardyń 52 bazasynan alady. «SMS-habarlama» qyzmeti iske qosyldy. Atqarýshylyq is júrgizý qozǵalǵannan jáne qamtamasyz etý sharalaryn qabyldaǵannan keıin boryshkerlerdi habardar etý rásimi áldeqaıda jyldamdatyldy.

Budan buryn habarlanǵandaı, alqa májilisinde byltyr sot-saraptamaǵa 190 myńnan astam materıal túskeni aıtyldy.

Foto: www.adilet.gov.kz