Birqatar daqyldardyń tuqymy 100 paıyz shetelden keledi - Aqylbek Kúrishbaev

ASTANA. QazAqparat - Otandyq aýylsharýashylyǵy ónimderi baǵasynyń joǵary bolýy deldaldardyń kóptiginen ǵana emes, sonymen birge ónimderdiń ózindik qunynyń joǵary bolýyna da baılanysty. Tabıǵı-klımattyq jaǵdaıy birdeı elderge qaraǵanda Qazaqstanda aýyl sharýashylyǵy daqyldarynyń ónimdiligi áldeqaıda tómen. Senator ónimdiligi joǵary jáne qurǵaqshylyqqa tózimdi sorttar men býdandardyń elimizdegi jetispeýshiligi - onyń basty sebebi dep sanaıdy.

Qazaq eginshilik jáne ósimdik sharýashylyǵy ǵylymı-zertteý ınstıtýtynda ótken kezdesý barysynda otandyq jáne sheteldik jetekshi ǵalymdar elimizde selektsııa men tuqym sharýashylyǵyn jedel damytý úshin qandaı sharalar qoldaný kerektigin talqylady.

Aqylbek Kúrishbaevtyń aıtýynsha, qazirgi ýaqytta sorttyq tuqymdardyń 60%, al birqatar aýyl sharýashylyǵy daqyldarynyń 100% Qazaqstanǵa shetelden, kóbine Reseı Federatsııasynan ákelinedi.

Osylaısha, depýtat elde azyq-túlik qaýipsizdiginiń negizi buzyldy dep sanaıdy.

«Sanktsııalyq teketirestiń qazirgi jaǵdaıynda bizdiń áriptesterimiz suryptyq tuqym eksportyn toqtatatyn bolsa, onda Qazaqstannyń aýyl sharýashylyǵy sapaly tuqym materıalynsyz qalýy múmkin» , - dedi senator.

Sarapshylar sheteldik úzdik selektsııalyq jańalyqtardy transfertteý jáne beıimdeýge baılanysty elimizdiń soltústiginde – Baraev atyndaǵy astyq sharýashylyǵynyń ǴÓO bazasynda jáne ońtústiginde – Qazaq eginshilik jáne ósimdik sharýashylyǵy ǵylymı-zertteý ınstıtýtynyń bazasynda qazirgi zamanǵy jáne molekýlıarlyq bıologııa ádisteri negizinde otandyq sorttar men býdan shyǵaratyn eki selektsııalyq ortalyqty jedel túrde qurýdy usyndy.

«Otandyq tuqym sharýashylyǵynda qalyptasqan jaǵdaıdan shyǵýdyń jalǵyz joly – qazirgi zamanǵy selektsııalyq ortalyq qurý bolyp otyr. Joǵary ónimdi jáne qurǵaqshylyqqa tózimdi, jergilikti aýa-raıyna beıimdelgen ózimizdiń sorttarymen biz aýylsharýashylyǵy óndirisindegi turaqtylyq pen ónimdilikti arttyrýda aıtarlyqtaı serpilis jasaı alamyz. Otandyq ǵalymdar sheteldik áriptestermen birlese otyryp, Úkimet tarapynan tıisti memlekettik qoldaýdy talap etetin selektsııalyq ortalyqtar qurý baǵdarlamasyn ázirleýge daıyn» , - dep atap ótti Aqylbek Kúrishbaev.