Birqatar bıznes jeńildikke jetý úshin múgedekke qamqorlyqty qaǵaz júzinde ǵana oryndap otyr - B. Smaǵul
Aıta keterligi, atalǵan másele boıynsha «Ushqyn» atty Qyzylorda múgedekteriniń oqý-óndiristik kásipornynan depýtatqa hat kelip túsken. «Memleket basshysy «Jalpyǵa Ortaq Eńbek Qoǵamyn» qurý strategııalyq maqsatyn belgiledi. Endeshe Elbasymyz tapsyrǵandaı, eńbek etýge qabiletti jáne qyzyǵýshylyǵy men qulshynysy bar múgedek jandardy jumyspen qamtyp, olardyń qoǵam ómirine aralasýyna, áleýmettenýine memlekettik organdar, jeke kásipkerler jáne qoǵamdyq uıymdar bolyp múmkindik jasaýy kerek. Alaıda bul salada qıynshylyqtar týýda», - deıdi B. Smaǵul. Onyń sózine qaraǵanda, Úkimettiń 2011 jylǵy 31 qańtardaǵy №64 Qaýlysyna engen múgedekterdiń qoǵamdyq birlestikteriniń sany 125-ti qurǵan. Qazirgi kezde sonyń tek 45-i jumys istep tursa, onyń ishinde belsendi jumys jasaıtyn múgedekter uıymdarynyń sany 16 ǵana.
«Bul jerde taǵy bir túıtkildi másele týyndap, ol múmkindigi shekteýli azamattardy qatty alańdatýda. Keıbir iri kásipkerler múgedekterdiń qujattaryn jınap alyp, uıym quryp, ony kezinde QR Úkimetiniń 2011 jylǵy 31 qańtardaǵy №64 Qaýlysyndaǵy múgedekter mekemeleriniń tizimine engizgen. Ondaǵy maqsaty - múgedekter máselesin sheshýge degen shynaıy qamqorlyq emes, «Memlekettik satyp alýlar zańynyń» normalaryn utymdy paıdalanyp, óz upaılaryn túgendeý, qara basynyń paıdasyn kúıtteý bolǵan», - deıdi depýtat.
Osyndaı olqylyqtyń saldarynan álgindegideı mekemeler ózderine qaǵaz júzinde ǵana múgedekterdi tirkep qoıyp, shyn máninde on eki múshesi saý adamdarǵa jumys jasatýda. Onyń ústine keıbir mekemeler tsehtarynda kórshi elderdiń azamattaryn (ózbekterdi) jumysqa alǵan. Al jarymjan jandar bolsa, ózderine laıyqtalǵan jumys oryndaryna alynbaı, dalada qalyp jatyr.
«Kezinde júzdegen zaǵıptar men mylqaýlardy eńbekpen qamtyp otyrǵan oqý-óndiristik kásiporyndar bazasy búginde jeke azamattarǵa jalǵa berilip, tigin, polıgrafııalyq, jıhaz tsehtaryna aınalǵan. Bul jalǵa alýshylar tek aıaq-qoly balǵadaı, deni saý adamdardy ǵana jumysqa tartady. Biraq qujat túrinde osy mekemelerde múgedekter «jumys isteýde», deı kele depýtat elimizdegi múgedekter mekemesin tolyq tekserý qajettigin alǵa tartty.