Birqatar BAQ basshylary saılaý naýqanyn aqparattandyrý barysynda etıkalyq normalardy saqtaý týraly Hartııaǵa qol qoıdy (FOTO)
ASTANA. QazAqparat - Búgin Qazaqstannyń birqatar buqaralyq aqparat quraldary basshylary 2016 jyldyń 20 naýryzynda ótetin QR Parlamenti Májilisiniń kezekten tys jáne máslıhat depýtattarynyń kezekti saılaý naýqanyn aqparattandyrý barysynda etıkalyq normalardy saqtaý týraly Hartııaǵa qol qoıdy.
Atalǵan Hartııa QR Konstıtýtsııasyna, QR «Saılaý týraly» jáne «Buqaralyq aqparat quraldary týraly» zańdaryna sáıkes jasalǵan.
Hartııanyń negizgi maqsaty qazaqstandyqtardy saılaý naýqany, sonymen birge, QR Parlamenti Májilisi men máslıhattarynyń depýtattyǵyna kandıdattardyń qyzmetteri týraly BAQ-ta shynaıy ádil, tolyq jáne senimdi aqparattarmen qamtamasyz etý bolyp tabylady.
Sonymen birge, Hartııada BAQ Parlament Májilisi men máslıhat depýtattyǵyna tirkelgen barlyq kandıdattardyń, olardyń saıası kózqarastaryna qaramastan, ózderine teńdeı múmkindikke ıe bolýyna yqpal ete alatyny jáne solaı etýge tıistigi jazylǵan.
«Sóz bostandyǵy adamnyń negizgi quqyǵy bolyp tabylatynyn nazarǵa ala otyryp, aqparattardy izdeý, alý jáne taratý erkindigin jarııalaıtyn Azamat quqynyń jalpyǵa ortaq deklaratsııasynyń 19-babyndaǵy erejelerge sáıkes, QR Konstıtýtsııasyndaǵy sóz bostandyǵyna jáne aqparattardy zań tyıym salmaıtyn kez kelgen ádistermen alý jáne taratý quqy, tsenzýraǵa tyıym salý, konstıtýtsııalyq qurylysty, respýblıkanyń tutastyǵyn kúshtep ózgertýge úgitteý nemese nasıhattaý, memleket tutastyǵyn buzý, memleket qaýipsizdigine nuqsan keltirý, soǵysty, áleýmettik, násildik, ulttyq, dinı, taptyq jáne rýlyq ústemdikti, sondaı-aq, qatygezdik pen zorlyq-zombylyqqa tabynýshylyqqa tyıym salý erejelerin basshylyqqa ala otyryp, aqparattardyń adam quqy men bostandyǵyn júzege asyrýda, azamattyq qoǵam, demokratııalyq jáne quqyqtyq memleket qurýda, taza jáne ádil saılaýlar ótkizýde aıryqsha ról atqaratynyn sanaly túrde túsine otyryp, bizder, Qazaqstan jýrnalısteri men BAQ salasyndaǵy úkimettik emes uıymdar ókilderi QR Parlamenti Májilisi men máslıhat depýtattarynyń saılaý naýqany barysynda atalǵan Hartııa qaǵıdattaryn saqtaýdy mindettenemiz», - delingen qujatta.
Aıta keterligi, Hartııa BAQ ókilderi, úkimettik emes uıymdar jáne jýrnalıster qaýymy úshin qol qoıýǵa ashyq. «Bas redaktorlar klýby» qoǵamdyq birlestiginiń prezıdenti Bıbigúl Jeksenbaıdyń aıtýynsha, Hartııa aımaqtarǵa da joldanatyn bolady.
