Birqatar azyq-túlik 6 apta qatarynan arzandap keledi

ASTANA. QazAqparat – Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın azyq-túlik tapshylyǵy oryn alýy múmkindigine qatysty BAQ ókilderiniń saýalyna jaýap berdi, dep habarlaıdy QazAqparat tilshisi.

«Azyq-túlik qory jasaqtaldy. Biz 140 myń tonna qor jınadyq, qazir 113 myń tonnadan brondi alyp tastadyq. Bizde áli de qor bar. Buǵan qosa, Tájikstannan jetkizilim kútip otyrmyz. Ózbekstannan ımporttaý bastaldy. Baǵa sál ǵana joǵary bolady. Biraq, qazirgi ýaqytta tapshylyq týraly másele kóterýdiń qajeti joq. Belgilegen jospardy múltiksiz oryndaımyz», - dedi ol.

Onyń atap ótýinshe, búginde elimizde kartop, sábiz, qyryqqabat jáne pııazdyń jetkilikti qory bar.

«Ózderińiz de biletindeı, kásipkerler pııazdyń qandaı da bir bóligin eksportqa shyǵarýy úshin 20 myń tonnaǵa ruqsat berdik. Qazirdiń ózinde pııazdyń jańa ónimi egilip jatyr. Sonymen qatar qanttyń jetkilikti kólemi bar, kúrish egip jatyrmyz. Mine, altynshy apta qatarynan azyq-túliktiń 6 túri arzandap keledi: Olar – qaraqumyq, kúnbaǵys maıy, qant, taýyq eti. Ótken aptada kartop pen sábiz arzandaı bastady. Qazir turaqtandyrý qorlarynan bul azyq-túlik túrlerin naryqtyq baǵadan tómen mol kólemde bronnan shyǵardyq. Olardy 610 saýda núktesinde sata bastadyq. Búginde mundaı núktelerdiń sany Qazaqstan boıynsha 1 040-qa jetti», - dedi Serik Jumanǵarın.