Birqatar aýylsharýashylyq ónimderin ımporttaýshylar qara tizimge engizildi - AShM

NUR-SULTAN. QazAqparat - Qazaqstanǵa halyqaralyq saýda normalaryn buzyp, 24 júk kólikpen fıtosanıtarlyq sertıfıkaty joq ósimdik ónimderin tasymaldaýǵa tyrysqan ımporttaýshylarǵa aıyppul salynyp, olar qara tizimge engizildi. Sonymen qatar, olarǵa 30 kún ishinde QR jáne RF aýmaǵynda shekteýli sanktsııalar qoldanylady, dep habarlaıdy QazAqparat AShM baspasóz qyzmetine silteme jasap.

Aǵymdaǵy jyldyń 24-27 shildesi aralyǵynda Batys Qazaqstan oblysyndaǵy «Syrym» fıtosanıtarlyq baqylaý beketine Reseı Federatsııasynan karantınge jatqyzylǵan ónim: 10 – astyq, 5 – kartop, 4 – jemis, 3 – lımon, 2 – banan tıelgen 24 avtokólik kelgen.

Karantındik fıtosanıtarlyq baqylaý barysynda QR AShM memlekettik ınspektorlary taýarlardyń fıtosertıfıkattary joqtyǵyn anyqtady. Bul óz kezeginde halyqaralyq saýda normalaryn, ósimdikterdi qorǵaý jáne ósimdikter karantıni jónindegi halyqaralyq konventsııanyń jáne Eýrazııalyq ekonomıkalyq odaq talaptaryn óreskel buzý bolyp sanalady (EAEO sharty, EEK Keńesiniń 2016 jylǵy № 157 sheshimi, KOK 2010 jylǵy № 318 sheshimi).

«EAEO Ósimdikter karantınin qamtamasyz etý týraly» Kedendik odaq Komıssııasynyń 2010 jylǵy 18 maýsymdaǵy №318 qaýlysyna sáıkes, «EAEO kedendik aýmaǵynda karantındik fıtosanıtarlyq baqylaýdy (qadaǵalaýdy) júzege asyrý tártibi týraly Erejege» jáne «Ósimdikter karantıni týraly» QR Zańyna sáıkes fıtosanıtarlyq qaýiptiligi joǵary ónimderdi respýblıka aýmaǵyna eksporttaýshy eldiń fıtosanıtarlyq sertıfıkatynsyz tasymaldaýǵa qatań tyıym salynady.

Osynyń negizinde barlyq 24 avtokólik toqtalyp, sonyń saldarynan QR jáne RF shekarasy arasyndaǵy jolda uzyn-sonar kezek paıda boldy.

Alaıda, eki eldiń beketteri arasyndaǵy keptelis saldarynan týyndaǵan qolaısyzdyqqa baılanysty, sondaı-aq azyq-túlik baǵasyn turaqtandyrý maqsatynda júkterdiń fıtosanıtarlyq jaǵdaıy tereń zerthanalyq zertteýden ótkizilip, syrtqy ekonomıkalyq qyzmetke qatysýshylarǵa aıyppul salyp jáne EAEO ósimdikter karantıni salasyndaǵy zańnamasyn buzýshylar tizimine engizilgennen keıin júk kólikteriniń Qazaqstanǵa kirýine ruqsat etildi.

Sondaı-aq, atalmysh ımporttaýshylarǵa 30 kúntizbelik kún ishinde Qazaqstan Respýblıkasy men Reseı Federatsııasynyń aýmaǵynda fıtosanıtarlyq sertıfıkattar ala almaıtyndyǵy túsindirildi.

Sonymen birge, QR AShM Agroónerkásiptik keshendegi memlekettik ınspektsııa komıteti Reseı aýyl sharýashylyǵyn baqylaý komıtetimen osyndaı zań buzýshylyqtardyń aldyn alý jáne syrtqy ekonomıkalyq qyzmetke qatysýshylar arasynda túsindirý jumystaryn kúsheıtý boıynsha is-sharalardyń biryńǵaı algorıtmin ázirleý jóninde kelissózder júrgizýdi josparlap otyr.

Sonymen qatar, Agroónerkásiptik keshendegi memlekettik ınspektsııa komıteti Qazaqstan shekarasynda karantındik fıtosanıtarlyq baqylaýdy kúsheıtip, zań buzýshylarǵa qatysty qatań sharalar qoldanady.