Birqatar ákimshilik quqyq buzýshylyqtarǵa aıyppul kólemi tómendedi
ASTANA. QazAqparat - Qazaqstan Respýblıkasynyń ákimshilik quqyq buzýshylyq týraly kodeksine birqatar ózgertýler engizildi, dep habarlaıdy QazAqparat Astana qalasynyń ishki ister departamentine silteme jasap.
Atap aıtqanda, QR ÁQBK ákimshilik quqyq buzýshylyqtarynyń 40 quramy boıynsha ákimshilik aıyppuldar kólemi azaıtylǵan.
«Máselen, buǵan deıin mindetti saqtandyrý týraly kelisimdi bekitýden jaltarǵan tulǵaǵa 20 AEK kóleminde aıyppul salynsa, qazir mindetti saqtandyrý kelisimin bekitýden jaltarǵany úshin 10 AEK kóleminde aıyppul qarastyrylǵan. Múgedekterge arnalǵan avtoturaqqa kólik qoıý boıynsha 50 AEK aıyppul 10 AEK-ke nemese 24 050 teńgege deıin tómendetildi. Ótken jyly bul quqyq buzýshylyq úshin kólik tizgindeýshiler 113 450 teńge tóleıtin», - delingen Astana ІІD baspasóz qyzmeti jibergen habarlamada.
Sonymen birge, jaıaý júrginshilerdiń nemese jol qozǵalysynyń ózge de qatysýshylarynyń erejeni buzǵany úshin taǵaıyndalatyn aıyppul kólemi 5 AEK-ten (11 345 teńge) 2 AEK-ke (4 810 teńge) deıin azaıdy.
Kólik jyldamdyǵyn saǵatyna 10 shaqyrymnan 20 shaqyrymǵa deıin arttyrǵandarǵa (QR ÁQBK 595-baby) salynatyn aıyppul 10 AEK-ten 5 AEK-ke deıin, 20 shaqyrymnan 40 shaqyrymǵa jyldamdyqty arttyrǵandar úshin - 15 AEK-ten 10 AEK-ke, 40 shaqyrymnan joǵary jyldamdyqty arttyrǵandar úshin - 30 AEK-ten 20 AEK-ke deıin tómendetilgen. Atalǵan quqyq buzýshylyqty ákimshilik jaza qoldanylǵannan keıin bir jyl ishinde qaıtalanǵan jaǵdaıda tólenetin aıyppul kólemi 40 AEK-ten 30 AEK-ke deıin azaıtyldy.
Eske sala ketsek, 2017 jyldyń 28 jeltoqsanynda Memleket basshysy «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy
Zań 2017 jyldyń 29 jeltoqsanynda «Egemen Qazaqstan» gazetiniń № 250 (29231) sanyna resmı túrde jarııalandy jáne 2018 jyldyń 9 qańtarynan bastap, kúshine enedi.
Sondaı-aq, avtokólik ıeleri aıyppuldy birneshe tásilmen tóleı alady. «Qazposhta» AQ nemese ekinshi deńgeıli bankterdiń esep-kassalyq bólimsheleri arqyly jáne Kaspi, QIWI koshelek tólem qyzmeti termınaldary arqyly qolma-qol aqshalaı qarajatpen tóleı alady. Odan bólek, egov.kz portalynda tirkelý arqyly bank kartasymen, ekinshi deńgeıli bankterdiń ınternet-saıttarynda onlaın-tólem tásilderin qoldanýǵa bolady. Jol qozǵalysy qaǵıdalaryn buzý boıynsha aıyppuldardy egov.kz, HandyPay, MyPay syndy mobıldi qurylǵylar arqyly da tóleý múmkindigi qarastyrylǵan. Aıyppuldyń bar-joǵyn tekserip otyrý úshin Telegram messendjerinde @KazPostBot paraqshasyna jazylý qajet.
Astana ishki ister departamentiniń habarlaýynsha, aıyppuldyń tólengeni týraly túbirtekti ákimshilik polıtsııa bólimshelerine ákelýdiń qajeti joq. Tólengen aıyppuldar týraly barlyq habarlamalar ІІM ákimshilik quqyq buzýshylyqtar esebiniń aqparattyq júıesine avtomatty túrde túsip otyrady.
