Birqabatty Shyǵys: ShQO-da baǵdarlama aıasynda 500-den astam kópqabatty úı salynyp jatyr
ÓSKEMEN. QazAqparat – Shyǵys Qazaqstan oblysynda qurylys jumysy qarqyndy júrip jatyr, dep habarlaıdy QazAqparat tilshisi.
Aımaq basshysy Danıal Ahmetov óńir qurylysshylaryn kásibı merekemen quttyqtady.
«Sizderdiń eren eńbekterińizdiń arqasynda shaharlarda sáýletti ǵımarattar boı túzep, aýyldarda túrli baǵdarlamalar arqyly salynǵan baspanalar el ıgiligine berilýde. Bıyl Shyǵys Qazaqstan oblysy bir mıllıon sharshy metr turǵyn úı salý mejesin baǵyndyrdy. Biz úshin bul - úlken jetistik. Búgingi tańda «Birqabatty Shyǵys» baǵdarlamasy boıynsha 500-den astam kóppáterli turǵyn úı salynyp jatyr», - dedi ol.
Ákimniń aıtýynsha, oblysta mańyzdy áleýmettik jáne ınfraqurylymdyq nysandardy salý, jóndeý jáne qaıta jańǵyrtý boıynsha aýqymdy jumystar atqarylýda. Atap aıtqanda, Buqtyrma sý qoımasy arqyly ótetin kópir, Úrjar áýejaıy, Turǵysyn sý elektr stantsııasy, Semeı men Glýbokoe kentindegi qazandyqtar, gematologııalyq ortalyq jáne balalardy ońaltý ortalyǵy, úsh orta mektep, 7 stýdenttik jataqhana jáne kásiptik bilim alyp jatqan stýdentter tájirıbelerin shyńdaıtyn 10 ortalyq, tórtqabatty tennıs ortalyǵy, Rıdder, Semeı jáne Óskemen qalalaryndaǵy úlken shaǵyn aýdandardy damytý syndy jobalar bar.
«Eldi mekenderge de erekshe kóńil bólip kelemiz. Búgingi tańda oblys aýyldarynda 30-ǵa jýyq jańa áleýmettik-mádenı nysan salynyp jatyr. Olardyń qatarynda mádenıet jáne sport nysandary, sý qubyrlary, joldar men turǵyn úıler jáne taǵy basqa da áleýmettik mańyzǵa ıe nysandar bar», - dedi Danıal Ahmetov.
