Birqabatty Shyǵys: ShQO-da baǵdarlama aıasynda 106 myń sharshy metr úı salyndy
ÓSKEMEN. QazAqparat – Shyǵys Qazaqstan oblysynda «Birqabatty Shyǵys» baǵdarlamasy aıasynda 106 myń sharshy metr úı boı kóterdi, dep habarlaıdy QazAqparat tilshisi.
Aımaq basshysy Danıal Ahmetov qala jáne aýdan ákimderimen turǵyn úı, áleýmettik nysandar qurylysy boıynsha jınalys ótkizdi.
«Búginde Úrjar jáne Zaısan aýdandarynda qurylys qarqyny qýantarlyq. Zaısanda jalpy aýdany 12 myń sharshy metrdi quraıtyn qurylys júrgizilýde. Al Rıdderde halyq sany osy aýdandaǵydaı bolǵanymen, qurylys kólemi tek 7 myń sharshy metrdi quraıdy. Osy rette, ákimderge 2022 jylǵa arnalǵan qurylys baǵdarlamasyn jáne 2023 jyldyń mindetterin daıyndaýdy tapsyrdym. Onda qansha turǵyn úı salynatyndyǵy jáne jobalyq-smetalyq qujattamaǵa basymdyq berilgen jobalar kórsetilýi kerek», - dedi oblys ákimi.
Óz sózinde ol kommertsııalyq turǵyn úı salýǵa nıet bildirgen jeke ınvestorlardy qoldaıtynyn jetkizdi.
«Birqabatty Shyǵys» baǵdarlamasy aıasynda bıyl 106 myń sharshy metr jeke turǵyn úı salyndy. Bul ótken jylmen salystyrǵanda úsh esege kóp. Soǵan qaramastan jumysty kúsheıtý kerek. Altaı jáne Shemonaıha óńirlerinde salynyp jatqan úılerdiń sanyn kóbeıtý qajet. Qarashanyń aıaǵynda ákimderdi jeke qabyldap, turǵyn úı men áleýmettik nysandardyń qurylysyna qatysty esepterin tyńdaımyn», - dedi Danıal Ahmetov.
