Birinshi jartyjyldyqta elimizdiń sottary 8 613 adamǵa úkim shyǵardy

Bul týraly búgin QR Joǵarǵy Sotynyń  aǵymdaǵy jyldyń 1-shi jartyjyldyǵyn qorytyndylaýǵa arnalǵan brıfıng barysynda resmı ókil Oksana Peters málim etti.

Resmı ókildiń aıtýynsha, sot jumystaryn taldaý sot tóreligin júzege asyrý sapasynyń jaqsarǵanyn kórsetken. «Máselen, bıylǵy jyldyń alǵashqy jartyjyldyǵynda respýblıka sottary 18 myń 836 tulǵaǵa qatysty 16 myń 685 qylmystyq isti qarap, onyń ishinde 8 myń 613 tulǵaǵa qatysty úkim shyǵardy. Ótken jyly osy kezeńde 22 myń 672 tulǵaǵa qatysty 20 myń 141 qylmystyq is qaralǵan bolatyn. Bul rette sot sheshimderiniń 97,5 paıyzy zańdy jáne negizdi dep tanylǵan. Al qaralǵan 198 763 (ótken jyly 175 myń 881 azamattyq is) azamattyq istiń 97,8 paıyzy zańdy kúshine endi. 130 myń 365 ákimshilik ister boıynsha jasalǵan sot qaýlylarynyń 1,8 paıyzyna ǵana  shaǵym túsken», - dedi respýblıka sottary atqarǵan jumystyń qorytyndysy týraly baıandaǵan O. Peters. 

Onyń aıtýynsha, 1 shildede sot tóreligine senimdilik deńgeıin joǵarylatý, qoljetimdilikti qamtamasyz etý, isterdiń apellıatsııalyq jáne qadaǵalaý tártibin jetildirýge arnalǵan zań kúshine engen. Soǵan oraı, sot organdary qyzmetin jetildirý jumystary jalǵasatyn bolady.

Túzetýlerge sáıkes jergilikti sottardyń róli edáýir kúsheıetin bolady. «Oblystyq jáne oǵan teńestirilgen sottar boıynsha qylmystyq ister, azamattyq jáne ákimshilik ister boıynsha appellıatsııalyq sot alqalary quryldy. Apellıatsııalyq satydan tómengi satyly sottarǵa isti qaıta qaraýǵa joldaý joıylady. Sot aktilerine shaǵym berý tártibi de naqty rettelip, sot aktileriniń zańdyq kúshine ený merzimi qysqartyldy», - dedi O. Peters.

Bunyń barlyǵy sot isin ońtaılandyrýǵa, sot tóreligine qoljetimdilikti qamtamasyz etýge, adam jáne azamattyń quqyǵy men bostandyǵyn, zańdy múddelerin sot arqyly qorǵaýdyń tıimdiligin arttyrýǵa baǵyttalady.