Birinshi jartyjyldyqta Aqtóbede 6 áleýmettik dúken ashylady
ASTANA. QazAqparat - Aqtóbe oblysynyń ákimi Berdibek Saparbaevtyń tóraǵalyq etýimen ótken keńeste aımaqaralyq kooperatsııany damytý týraly másele talqylandy, dep jazady oblystyq «Aqtóbe» gazeti.
Oblys basshysy aımaqaralyq kooperatsııanyń basty maqsaty azyq-túlik jáne taýar qaýipsizdigi, ımportty azaıtý ekenin aıtyp ótti. Joba turǵyndardy deldaldardyń aralasýynsyz, otandyq azyq-túlik jáne taýarlarmen qoljetimdi baǵamen qamtamasyz etýdi kózdeıdi. Sonymen birge, aımaqaralyq kooperatsııa bizdiń aımaqta jańa saýda oryndaryn ashyp, óndiris qarqynyn ulǵaıtýdy maqsat etedi.
Búginde ońtústik oblystardan azyq-túlik ónimderi kóptep jetkizilýde. Tek naýryz aıynyń ózinde jalpy quny 83,5 mıllıon teńge bolatyn 32 tonna et, 76 tonna kókónis, 19 tonna jemis-jıdek, 14 tonna sút ónimderi, 30 myń jumyrtqa jetkizildi. Qazirgi ýaqytta ońtústiktiń aýyl sharýashylyǵy ónimderi «Tabys» kommýnaldyq bazaryna, shaǵyn bazarlarǵa, sonymen birge, qaladaǵy ázirge jalǵyz áleýmettik dúkenge jetkizilýde.
Kókónis, jarma, et jáne sút ónimderine tómengi ústeme aqy qosyp satatyn saýda jelilerin kóbeıtý úshin oblys ákimi Berdibek Saparbaev osy jyldyń maýsym aıynda kem degende 7 áleýmettik dúken ashyp, azyq-túlik ónimderin iri dúkenderge tikeleı jetkizý jaǵyn qolǵa alýdy tapsyrdy.
Búgingi kúni aýyl sharýashylyǵy basqarmasynyń málimetterine sáıkes, Aqtóbe oblysy azyq-túlik sebetine kiretin 33 túrli azyq-túliktiń 25 túrimen ózin-ózi qamtamasyz ete alady. Aımaqaralyq kooperatsııa aıasynda jetkiliksiz azyq-túlik ónimderi men taýarlardy aqtóbelikterge tıimdi baǵamen jetkizý qarastyrylyp otyr.
« Arzan azyq-túlik satatyn naryqty izdestirý qajet. Ońtústik oblystarmen ónim jınaý naýqanynda arzan baǵamen kókónis pen jemisti satyp alý jóninde erterek kelisimsharttarǵa otyrǵan durys. Ońtústiktiń taýar óndirýshilerine qolaıly jaǵdaı jasap, bos turǵan saýda oryndary men qoımalardy berýdi tapsyramyn», - dedi keńes otyrysynda oblys basshysy.
