Birinshi jartyjyldyq boıynsha jumys nátıjeleri jaǵymdy kórsetkishterge qol jetkizgenimizdi rastaıdy - Rashıd Túsipbekov
ASTANA. 30 shilde. QazAqparat - Búgin Qazaqstan Respýblıkasy Ekonomıkalyq qylmysqa jáne sybaılas jemqorlyqqa qarsy kúres (qarjy polıtsııasy) agenttiginiń 2013 jylǵy birinshi jartyjyldyq qorytyndysy boıynsha alqa otyrysy bastaldy.
Keleli jıynǵa atalmysh vedomostvonyń ortalyq apparaty men aýmaqtyq bólimshelerdiń basshylyq jáne jeke quramdary konferenbaılanys arqyly qatysýda.
Alqa otyrysyn ashqan Agenttik tóraǵasy Rashıd Túsipbekov: «Birinshi jartyjyldyq boıynsha jumys nátıjeleri bizdiń barlyq negizgi baǵyttar boıynsha jaǵymdy kórsetkishterge qol jetkizgenimizdi rastaıdy»,-dep atap ótti.
R.Túsipbekovtiń aıtýynsha, aýyr jáne asa aýyr qylmystardy ashý 25%-ǵa ósken, sybaılas jemqorlyq qylmystardy anyqtaý 8%-ǵa joǵarylaǵan. Sybaılas jemqorlyq qylmystar úshin jaýapkershilikke tartylǵan tulǵalardyń sany 20%-ǵa artqan.
Jyl basynda júıeli sybaılas jemqorlyq túsinigi qaıta qaralǵan bolatyn. Nátıjesinde jergilikti jerlerde jumystyń baǵyty usaq qylmystardan jemqorlyqtyń qaýipti jáne uıymdasqan nysandaryn anyqtaýǵa buryldy.
Nátıjesinde júıeli jemqorlyq faktileri boıynsha 221 qylmystyq is qozǵaldy.
Ázirlengen sybaılas jemqorlyq táýekelderiniń tól qujattary da óziniń jaǵymdy nátıjelerin berdi. Olar boıynsha ótken jylmen salystyrǵanda 9 esege kóp qylmystyq ister qozǵaldy.
Qarjy polıtsııasy óz jumysyn qaýiptiligi joǵary ekonomıkalyq qylmystardy ashýǵa baǵyttady. Osyndaı faktiler boıynsha 3198 qylmystyq is qozǵaldy. Olardyń barlyǵy derlik (92%) kóleńkeli ekonomıka salasyna jatady.
Uıymdasqan qylmystyq toptarmen kúres baǵytynda da jaǵymdy ózgerister oryn ala bastaǵan. Osy sanattaǵy 26 qylmystyq is qozǵalǵan.
