Birinshi vıtse-premer ShQO-nyń shyǵys jáne soltústik-shyǵys aýmaqtarynda baqylaýdy kúsheıtip, ońtústik-shyǵysta qurylys jumystaryn bastaýdy tapsyrdy
ASTANA. Sáýirdiń 27-si. QazAqparat /Gúlmıra Álıakparova/ - Búgin Úkimette ótken keńeste QR Premer-Mınıstriniń birinshi orynbasary Ómirzaq Shókeev, Tótenshe jaǵdaılar mınıstrligine Shyǵys Qazaqstan oblysynyń shyǵys jáne soltústik-shyǵys aýmaqtarynda baqylaýdy kúsheıtip, ońtústik-shyǵysta qurylys jumystaryn bastaýdy tapsyrdy.
Keńes barysynda QR Tótenshe jaǵdaılar vıtse-mınıstri Valerıı Petrov tasqyndar boıynsha Qazaqstandaǵy jalpy jaǵdaıdy baıandap berdi. Onyń aıtýynsha, bıyl sý basý qaýpiniń aýmaǵynda Almaty, Shyǵys Qazaqstan, jartylaı Jambyl jáne Pavlodar oblystary ornalasty. Tabıǵı apat saldarynan barlyǵy 100-den astam eldi meken sý astynda qalyp, 18 myńnan astam adam turaqty turǵylyqty jerlerinen qaýipsiz jerge kóshirildi.
«Al ShQO-da tasqyn máselesi turaqtana bastaǵanymen, oblystyń taýly óńirlerinde jaǵdaı qaýipti kúıinde qalyp otyr. Ǵaryshtyq monıtorıngige sáıkes, aımaqtyń jazyq jerleri qardan tolyǵymen derlik tazardy. Tek taýly aýmaqtarda onyń mol kólemi áli kúnge deıin jatyr», - dedi V.Petrov.
Vıtse-mınıstr atap kórsetkendeı, ShQO-nyń 7 aýdanynda tasqyndy sýdan zardap shekken eldi mekenderdiń jalpy sany - 26. Sý astynda qalǵan 1176 úıdiń 535-i turýǵa múldem jaramsyz. Osylaısha 1200 adam búginde baspanasyz qalyp otyr.
Ó.Shókeev, Kúrshim jáne Zyrıan aýdandary ornalasqan shyǵys jáne soltústik-shyǵys aýmaqtarda baqylaýdy kúsheıtip, Tarbaǵataı men Zaısanda qurylys jumystaryn bastaýdy tapsyrdy.
