Birinshi vıtse-premer bıyl Qyzylordany sýmen 100 paıyzǵa qamtamasyz etýdi tapsyrdy - Úkimettegi keńes
27-si. QazAqparat /Gúlmıra Álıakparova/ - Kóksaraı sý qoımasy ýaqytyly iske qosylmaǵanda Qyzylorda oblysynyń 57 eldi mekeni tasqyndy sýlardan zardap shegýi múmkin edi. Bul týraly búgin Úkimet úıinde, birinshi vıtse-premer Ómirzaq Shókeevtiń tóraǵalyǵymen ótken keńesten keıin jýrnalısterge bergen suhbatynda Tótenshe jaǵdaılar vıtse-mınıstri Valerıı Petrov aıtty.
«Bıyl Elbasynyń tapsyrmasymen Kóksaraı sý rettegishiniń birinshi kezegi iske qosyldy jáne bul ýaqytyly boldy. Sebebi, Syrdarııanyń ótkizý kólemi óte úlken boldy, al Shardara sý qoımasy tolyǵymen derlik tolǵan edi. Kóksaraı sý rettegishine 910 mıllıon tekshe metr sý qabyldanǵandyqtan, biz Qyzylorda oblysynda qaýpti jaǵdaıdy boldyrǵanymyz joq. Bul ýaqytta ózen jartylaı muz astynda bolǵan edi. Sondyqtan, jańa sý rettegish bolmaǵan jaǵdaıda, 57 eldi meken tasqyndy aýmaqta qalar edi», - dedi V.Petrov.
Keńes barysynda Ó.Shókeev, Kóksaraıǵa jınalǵan 910 mln. tekshe metr sýdy tıimdi paıdalanýdy tapsyrdy. «Biz bul sýdy maqsatsyz aǵyzyp jiberý úshin jınap jatqanymyz joq. Ony Qyzylorda oblysyndaǵy aýyl sharýashylyq jáne sýarý jumystaryna jumsaý qajet», - dedi ol.
Sondaı-aq Ó.Shókeev, Kóksaraıdyń ótkizý múmkindigin retteýdi tapsyryp, bıyl Qyzylordany sýmen 100 paıyzǵa qamtamasyz etýdi tapsyrdy.
Óz kezeginde V.Petrov, jańa nysanǵa jınalǵan sýdy paıdalaný úshin Shardara sý qoımasy ýaqytsha jabylatynyn aıtty. «Óńirde sýdyń qajetti mólsheri - 5 mıllıard 300 mıllıon tekshe metr sý jınaldy. Meniń oıymsha, bıyl Shardaranyń tómengi bóliginde Ońtústik Qazaqstan men Qyzylorda oblystarynda sýmen problema bolmaıdy», - dedi.
