Birinshi vıtse-premer azamattardy jeke qabyldady

NUR-SULTAN. QazAqparat - QR Premer-Mınıstriniń birinshi orynbasary - Qarjy mınıstri Álıhan Smaıylov «Nur Otan» partııasynyń Respýblıkalyq qoǵamdyq qabyldaýynda azamattardy jeke qabyldady. Bul týraly QazAqparat primeminister.kz saıtyna silteme jasap habarlaıdy.

Á. Smaıylov elimizdiń túrli óńirleri turǵyndarynyń suraqtaryna jaýap berdi.

Máselen, partııa qabyldaýyna «HILL Sorparation» JShS memlekettik organdarmen ózara is-qımyl jónindegi dırektory Jantý Mamashev elden avtokólikpen ashyq tústi munaı ónimderin tasymaldaýǵa tyıym salýǵa qatysty máselemen júgindi. Buǵan JShS úshin eksporttyq kelisimsharttar mindettemelerin oryndaý boıynsha jol berýge bolmaıdy. Ol Á. Smaıylovtan elden avtokólikpen ashyq tústi munaı ónimderin shyǵarýǵa tyıym salý týraly buıryqqa ózgerister engizý boıynsha yqpal etýdi ótindi.

Birinshi vıtse-premer atap ótkendeı, Memlekettik kirister komıteti avtokólikpen elden ashyq tústi munaı ónimderin shyǵarýǵa tyıym salatyn túzetýlerge qatysty túsinik bergen. Sondyqtan mundaı problema týyndamaýy tıis. Bıyl qazan aıynyń sońyna deıin atalǵan másele sheshilýi kerek.

Qazaqstannan qara jáne tústi metaldar synyqtaryn tasymaldaýǵa tyıym salýdy engizý týraly «Shymkent Temir» JShS ókili Begim Qudabaev júgindi.

«Bul máseleni sheshýdiń eki joly bar. Birinshisi - tasymaldaýǵa tyıym salý. Ekinshisi - lıtsenzııalaý. Ony qabyldaǵan jaǵdaıda bul sala ózdiginen retteletin bolady. Óıtkeni lıtsenzııasy barlar lıtsenzııasy joqtarǵa metall synyqtaryn jınaýǵa múmkindik bermeıdi. Demek, memlekettik organdarmen qoıan-qoltyq jumys isteıtin bolady. Sondyqtan lıtsenzııa qabyldanǵan jaǵdaıda metall synyqtaryn shetelge shyǵarý kólemi birshama azaıatyn bolady», — dedi Álıhan Smaıylov.

Onyń aıtýynsha, osy másele boıynsha buıryq jobasy ázirlenetin bolady, biraq ortaq sheshimge kelý úshin eki taraptyń da talqylaýy qajet.

Sonymen qatar qabyldaýda jeke máseleler de qaraldy. Máselen, Shynykúl Ózbekova qaza tapqan nemeresiniń otbasy úshin turǵyn úı máselesin sheshý ótinishimen júgindi. Másele qoǵamdyq qabyldaýda Qorǵanys mınıstrliginiń ókilderimen birge talqylandy.

Qabyldaýda budan basqa Salyq kodekesine jeke sot oryndaýshylarynyń aýktsıondyq alymdardy tóleýine qatysty ózgerister engizý týraly másele kóterildi, Á. Smaıylov qazirgi jaǵdaıdy túsindirip, Qarjy mınıstrliginiń osy másele boıynsha ustanymyn jetkizdi.

«Nur Otan» partııasynyń qoǵamdyq qabyldaýynda kóterilgen barlyq máseleler mınıstrdiń jeke baqylaýyna alynatyn bolady.