Birinshi toqsanda tótenshe jaǵdaılar saldarynan mert bolǵandar sany 38,3 paıyzǵa tómendedi - TJM
ASTANA. 13 mamyr. QazAqparat - Aǵymdaǵy jyldyń birinshi toqsanynda elimizdegi tótenshe jaǵdaılardan qaza tapqandar sany 38,3 paıyzǵa tómendedi.
Bul týraly búgin QR Parlamenti Májilisindegi Úkimet saǵatynda Tótenshe jaǵdaılar mınıstri Vladımır Bojko málim etti.
Sonymen birge, aǵymdaǵy jyl basynan beri tótenshe jaǵdaılar sany 29,3 paıyzǵa, olardan keletin materıaldyq zalal kórsetkishi 33,2 paıyzǵa tómendegen.
«Naýryz aıynda «Kóktem-2013» respýblıkalyq oqý-jattyǵý sheńberinde shuǵyl den qoıý kúshteri men quraldarynyń ázirligi tekserildi. Mınıstrliktiń barlyq bólimsheleri turaqty daıarlyqqa keltirildi, qoıylǵan mindetterdi oryndaýǵa 2444 adamnan, 440 birlik tehnıkadan, 67 birlik júzý quralynan, 3 tikushaqtan turatyn utqyr qutqarý toby daıyndaldy. Yqtımal sý basý ýchaskelerine turaqty monıtorıng júrgizilip, 759 gıdrotehnıka qurylysynyń jaı kúıi tekserildi», deıdi V. Bojko.
Onyń aıtýynsha, budan bólek 129 shaqyrym bógen nyǵaıtylǵan. 42,3 shaqyrym ózen arnasy tereńdetilip, ózenderdiń qaýipti ýchaskelerinde 50 ret jarylys jumystary atqarylǵan. Sonymen qatar, bıyl qalalar men eldi mekenderden 7,5 mıllıon tekshe metr qar shyǵarylǵan.
