Birinshi toqsanda negizgi kapıtalǵa salynǵan ınvestıtsııa 8,5 paıyzǵa ósti

Bul týraly búgin 2013 jyldyń birinshi toqsanyndaǵy áleýmettik-ekonomıkalyq damý qorytyndylaryna arnalǵan QR Úkimetiniń otyrysynda Ekonomıka jáne bıýdjettik josparlaý mınıstri Erbolat Dosaev málim etti.

«Ekonomıka ósiminiń basty faktorlarynyń biri negizgi kapıtalǵa salynǵan ınvestıtsııalar kóleminiń ulǵaıý úrdisiniń qalyptasýy ekendigin atap ótkim keledi. Ol birinshi toqsanda 8,5 paıyzǵa artty», - dedi ol.

Bul rette mınıstrdiń sózine qaraǵanda, óńdeý ónerkásibine salynǵan ınvestıtsııalardyń ósimi 42,2 paıyzdy quraǵan. Al kólik salasyna 22,2 paıyz, ken óndirý ónerkásibi men aýyl sharýashylyǵyna 12 paıyzdan astam ınvestıtsııa quıylǵan.

«Investıtsııa kóleminiń barynsha ulǵaıýy Qyzylorda, Shyǵys Qazaqstan, Jambyl, Batys Qazaqstan, Mańǵystaý jáne Qaraǵandy oblystarynda baıqaldy»,- dep atap ótken E.Dosaev, Aqmola, Almaty, Ońtústik Qazaqstan oblystary men Almaty, Astana qalalarynda ınvestıtsııa kóleminiń birshama qysqarǵandyǵyn aıtty.