Birinshi synypqa baratyn oqýshylar úshin qujat sáýirden bastap qabyldanady

NUR-SULTAN. QazAqparat – Birinshi synypqa baratyndar úshin qujattardy qabyldaý 1 sáýirden bastalady. Bul týraly QR Bilim jáne ǵylym mınıstrligi Mektepke deıingi jáne orta bilim komıtetiniń tóraǵasy Gúlmıra Kárimova aıtty, dep habarlaıdy QazAqparat tilshisi.

Balalardy mektepke qabyldaý tártibi QR BǴM 2018 jylǵy 12 qazandaǵy 564 buıryǵymen bekitilgen oqýǵa qabyldaýdyń úlgilik qaǵıdalarynda aıqyndalǵan. 1-synypqa 6 jastan bastap balalar ata-anasynyń nemese bilim alýshylardyń zańdy ókiliniń jeke ótinishi negizinde qabyldanady.

Osy oraıda mynadaı qujattar qajet: balanyń týý týraly kýáliginiń kóshirmesi; 026/ý-3 nysany boıynsha densaýlyq pasporty; 063/ý nysany boıynsha densaýlyq jaǵdaıy týraly qujat (ekpe kartasy) jáne 3h4 kólemindegi fotosýrettiń eki danasy.

«Qujattardy qabyldaý bıylǵy kúntizbelik jyldyń 1 sáýirinen 1 tamyzyna deıin júrgiziledi», - dedi G. Kárimova Ortalyq kommýnıkatsııalar qyzmetinde.

Birneshe jyl boıy qujattardy jáne balalardy mektepke qabyldaý boıynsha memlekettik qyzmet avtomattandyryldy. 1-synypqa qabyldaý elektrondyq úkimettiń Egov.kz veb-portaly arqyly júzege asyrylady. Óńirlerdegi bilim basqarmalary áleýmettik jeliler men BAQ arqyly ata-analar arasynda balalardy mektepke qabyldaý erejeleri týraly aqparattyq-túsindirý jumystaryn qosymsha júrgizetin bolady.

Onyń aıtýynsha, bıyl birinshi synypqa 420 myń búldirshin barady dep eskerilgen. Bul kórsetkish byltyrǵa qaraǵanda joǵary.