Birinshi synyp oqýshylary alǵashqy sabaqtaryn Konstıtýtsııa kúnine arnaıdy

ASTANA. 22 tamyz. QazAqparat - 29 tamyzda Qazaqstan Respýblıkasy Tuńǵysh Prezıdentiniń murajaıynda Konstıtýtsııa kúnine arnalǵan merekelik sabaq ótedi. Bul týraly astana.kz saıtyna is-sharany uıymdastyrýshylar habarlady.

Bıyl Bilim kúnin Raıymbek batyr atyndaǵy №50 «Qazǵarysh» mektep-lıtseıiniń tabaldyryǵyn alǵash attaıtyn 30 bala atap ótedi. Kishkentaı astanalyqtar alǵashqy sabaqtaryn Konstıtýtsııa kúnine arnaıdy, elimizdiń bas qujatynda jazylǵan quqyqtarmen jáne mindettermen tanysady. Balalarǵa arnalǵan mereke 40 mınýttyq sabaq túrinde ótedi. Biraq matematıka men ádebıettiń ornyna olar bilim eline qyzyqty saıahat jasaıdy, memlekettiń negizgi zańynyń shyǵý tarıhymen tanysady, Qazaqstan Respýblıkasy Tuńǵysh Prezıdentiniń Konstıtýtsııa jobasyn jasaýdaǵy róli týraly biletin bolady.

Baldyrǵandar murajaıda Qazaqstan táýelsizdiginiń tarıhymen tanysady. Uıymdastyrýshylar is-sharaǵa qatysýshylardyń barlyǵyna birinshi sabaqtan estelik retinde syılyqtar men kádesyılar taratady.

Eske salaıyq, 30 tamyzda memlekettik mereke - elimizdiń Ata zańynyń, ulttyq damýymyzdyń negizine aınalǵan erekshe tarıhı mańyzy bar qujattyń 18 jyldyǵy atap ótiledi.