Birinshi ret qatysqanymda qıyn boldy – hımııadan Halyqaralyq olımpıada jeńimpazy
Olımpıada onlaın-formatta Qytaıdyń Tıantszın qalasynda ótti. Oǵan álemniń 83 elinen 300-den astam jas hımıkter qatysty. Bes saǵat ishinde oqýshylar toǵyz tapsyrmany oryndaýy kerek edi.
Qazaqstan atynan Nur-Sultan, Qaraǵandy, Pavlodar jáne Aqtaý qalalarynan 4 oqýshy qatysty. Olardyń barlyǵy júldeger boldy. Sanjar Bısenáli, Sanjar Nurǵalıev jáne Almıra Nýrlanova kúmis medaldar ıelendi.
Altyn júldeni Qaraǵandy qalasynyń № 1 «Bilim-Innovatsııa» lıtseı-ınternatynyń 11-synyp oqýshysy Madııar Qasymaly aldy. Jetekshisi – Abylaı Samatov.
Madııardyń hımııaǵa qyzyǵýshylyǵy 7-synypta bastaldy. Ol ótken jyly osy olımpıadada kúmis jeńip aldy.
«Birinshi ret qatysqanymda qıyn boldy. Tapsyrmalardy jyldamdyqpen sheshe bilý jáne uqyptylyqqa, shyǵarmashylyq oılaýǵa ıe bolý kerek edi. Muny bile otyryp, daıyndyq kezinde men problemalardy ýaqytynda sheshý daǵdylaryn damytýǵa kóp kóńil bóldim. Meniń súıikti bólimim – organıkalyq hımııa, ol negizgi uǵymdar arqyly osy álemniń qurylymyn túsindiredi», – deıdi Madııar Qasymaly.
Olımpıadashylardy óziniń telegram-kanalynda jeńisimen QR Bilim mınıstri Ashat Aımaǵambetov quttyqtady: «Oqýshylarymyzdy jańa joǵary nátıjelermen jáne laıyqty jeńistermen quttyqtaımyn! Bizdiń balalarymyzdyń matematıka, fızıka, hımııa pánderi boıynsha halyqaralyq olımpıadalardaǵy jetistigi – jaratylystaný pánderi boıynsha jaqsy jetistikterdiń kórsetkishi. Bizdiń komanda músheleriniń tabandylyǵy, aqyl-oıy, eńbegi men jeńiske degen jigeri barlyq basqa oqýshylar úshin úlgi bolady».
Mınıstr sondaı-aq osy olımpıadalarǵa qatysý tarıhynda alǵash ret júldegerler UBT tapsyrmaı-aq qazaqstandyq joǵary oqý oryndarynda bilim alý úshin aqshalaı syılyqtar men granttar alatynyn habarlady.
