Birinshi ret áıel adam Slovakııanyń Premer-mınıstri boldy, ol - professor-sotsıolog Iveta Radıchova
ASTANA. Shildeniń 10-y. QazAqparat - Slovakııada birinshi ret áıel adam Premer-mınıstr boldy. Úkimet basshysy qyzmetine Slovakııanyń demokratııalyq jáne hrıstıandyq odaǵynyń jetekshisi, 53 jastaǵy professor-sotsıolog Iveta Radıchova keldi,
dep habarlaıdy Deutsche Welle.
Eldiń bılik ókilderiniń aıtýynsha, buǵan deıingi Premer-mınıstr Robert Fıtso men onyń úkimetiniń otstavkaǵa ketýi jónindegi protsedýralary resmı qabyldanysymen Slovakııa prezıdenti Ivan Gashparovıch úkimet basshylyǵyna birden I.Radıchovany taǵaıyndady.
Jańa premer úkimet múshelerin jaqyn kúnderde taǵaıyndaıdy dep kútilýde. Onyń quramyna Hrıstıan-demokratııalyq qozǵalystyń, sondaı-aq taıaýda qurylǵan ońshyllıberaldyq «Azattyq jáne yntymaqtastyq» partııasynyń jáne slovakııa men vengr halqynyń birligin nyǵaıtýǵa baǵyttalǵan «Most-Hıd» partııasynyń ókilderi kiredi.
R.Fıtsonyń otstavkaǵa ketýi onyń taıaýdaǵy parlament saılaýyndaǵy jeńilisine baılanysty bolyp otyr. Parlamenttegi 150 mandattyń basym bóligin nemese 79-yn koalıtsııaǵa jasaqtalǵan ońshyl partııalar aldy.
