Birinshi Halyqaralyq «Jibek Joly» festıvali márege jetti - «Astana Opera»
ASTANA. QazAqparat - «Astana Operada» birinshi Halyqaralyq «Jibek Joly» festıvali máresine jetti. Sharaǵa ártúrli elder men qalalardan kelip qatysqan qonaqtardyń aıtýynsha, óner baıqaýy óte qyzyqty ótti.
20 kún boıy elordalyq teatr sahnasynda álemdegi úzdik teatrlardyń prımalary men premerleri, sondaı-aq opera juldyzdary óner kórsetti.
Bas qala spektaklderdiń ár kúnin anshlagpen qabyldady. Úsh apta ishinde óner oshaǵyna on bes myńnan astam kórermen keldi. Muqan Tólebaevtyń «Birjan-Sara» operasyna ártúrli fakýltetten 200 astam stýdent keldi, osylaısha rekord jasaǵan jastar ulttyq tól týyndymyzben tanysýǵa arnaıy jol tartqan. Dj. Pýchchınıdiń «Bogema» operasy da jastar nazarynan tys qalǵan joq, ártisterdiń sahnadaǵy kóńil-kúıin zaldaǵylar bir demmen tamashalap shyqty.
Sondaı-aq, «Toska» operasynda óner kórsetken áıgili ıtalıandyq úshtik: Anna Pırotstsı, Massımo Djordano men Alberto Gazale kórnekti ártister «Astana Opera» shańyraǵynyń astynda jyl saıyn bas qosyp, tájirıbe almasyp, Qazaqstannyń mýzykalyq shyǵarmashylyǵymen tanysý múmkindigine ıe bolady degen senimderin de bildirdi. Álbette, olar biraýyzdan opera áleminiń ózinshe bir keremetine aınalǵan teatr ǵımaraty jaıynda, osy biregeı sáýletti qurylysty dúnıege ákelgen Qazaqstan Respýblıkasynyń Prezıdenti Nursultan Ábishuly Nazarbaevqa degen ózderiniń tańdanysy men qurmetin erekshe atap ótti.
Festıval aıasynda kórsetilgen «Aqqý kóli», «Romeo men Djýletta», «Spartak» baletteri «Astana Opera» repertýarynan laıyqty oryndy ıelenip, osy kúzde Amerıka, Frantsııa jáne Reseıden kelgen sheberler onyń ajaryn asha tústi. Olar: Bostondyq teatrdyń premeri - Lasha Hozashvılı, «Bordo» Ulttyq Operasynyń etýali Roman Mıhalev (Frantsııa), Reseı Úlken teatrynyń prımasy men premeri - Ekaterına Shıpýlına, Aleksandr Volchkov. Qonaqtarǵa elordalyq sahnanyń keńdigi unady.
«Astana Opera» tórine gastrolmen Abaı atyndaǵy teatr ujymy kelgende, balet merekesi odan ármen jalǵasty. Trýppa Borıs Eıfmannyń kúrdeli baleti - «Qyzyl Jızeldi» qoıdy. Ónerdi baǵalaýshylar ártisterdiń jaqsy daıyndyqpen kelgenin, olardyń spektakldi emotsııalyq turǵydan jetkize alatyn qabiletin atap ótti.
Astanalyq kórermendi Qytaıdan kelgen ártisterdiń Gala kontserti erekshe áserge bóledi. Jarqyraǵan kostıýmder, tsırk atrıbýtıkasynyń nyshandary, ártister talanty men shydamdylyǵy birlesip qaıtalanbas shoý syılady. Shoý estafetasyn odan ary 3D áserli qoıylymymen Astana Ballet óner ujymy ilip áketti. Qııal arqyly bir álemnen ekinshisine aýysýmen ushtasqan adam janynyń dúnıege kelýiniń fılosofııalyq tarıhy kórermenge festıvaldiń 12-shi kúninde usynyldy. Bir aktiden turatyn balet, nátıjesinde Jer júziniń ásemdigin dúnıege ákeletin adam janynyń qara - zulym, meıirimdi - aq jaǵy qyrlarynyń ózara áreketi jaıly baıandap berdi. Nıkıta Dmıtrıevskıı klassıkalyq jáne zamanaýı horeografııany bir arnaǵa qyzyqty etip toǵystyryp kórsetti, dep habarlaıdy «Astana opera» teatrynyń baspasóz qyzmeti.
