«Birinshi beket - Qazaqstan» ilki jobasyn júzege asyrý otandyq tasymaldaýshylar úshin ózderiniń áleýetin baǵalaýǵa múmkindik beredi
Búgin atalǵan másele boıynsha tasymaldaýshylardyń aqparattyq júıesine arnalǵan shara barysynda «Indýstrııany damytýdyń qazaqstandyq ınstıtýty» AQ basqarma basshysy Azamat Ahmerov osylaı málim etti.
Kompanııa basshysynyń aıtýynsha, el Úkimeti Indýstrııa jáne jańa tehnologııalar mınıstrliginiń aldyna jergilikti ónerkásip kásiporyndaryn jańǵyrtý úderisine járdemdesý baǵytynda strategııalyq mindetter júktep otyr. «Bul rette atalmysh kásiporyndar otandyq jáne halyqaralyq naryqtarda laıyqty básekege túsýleri úshin jaǵdaılar jasalýy shart. Osyndaı strategııalyq mindetti júzege asyrý úshin «Ónimdilik-2020» baǵdarlamasy ázirlengen bolatyn. Bul baǵdarlama byltyrǵy jyldyń naýryzynan qolǵa alynyp keledi. Endigi maqsat bul baǵyttyń sapalyq deńgeıi men qamtý aýqymyn keńeıte túsý», - deıdi A.Ahmerov.
Indýstrııany damytýdyń qazaqstandyq ınstıtýty «Brıtısh grýp» kompanııasynyń otandyq tasymaldaýshylar úshin biregeı aqparattyq baza qurý jónindegi bastamasyna qoldaıdy. «Atalǵan bastama elimizdiń iri munaıgaz jobalaryn tolyq qamtıtyn bolady. Al «Birinshi beket-Qazaqstan» ilki jobasyn júzege asyrý qazaqstandyq tasymaldaýshylarǵa ózderiniń áleýetin baǵalaýǵa múmkindik beredi. Munymen qosa, jańǵyrtý baǵyttarynda jańa iskerlik múmkindikter ashýǵa da kóp jaǵdaılar qarastyrylatyn bolady», - deıdi ol.
Eske sala ketsek, «Birinshi beket - Qazaqstan» ilki jobasy «Indýstrııany damytýdyń qazaqstandyq ınstıtýty» AQ men «BıDjı grýp» jáne «Ahılles» kompanııalarymen birlese qolǵa alynǵan. Baǵdarlamany tolyq júzege asyrý nátıjesinde óndiristik qýattylyqtyń ornalasýy týraly biregeı málimetter bazasy qurylatyny kútiledi.
