Birikken úsh banktiń jańa fılıaly ashyldy
ALMATY. QazAqparat - Búgin Almatyda jańa «Forte bank» AQ-nyń bólimshesi ashyldy. Esterińizge sala keteıik, bıyl kóktemde Alıans, Temir, Forte bankterdiń birigetini týraly qaýeset shyqqan bolatyn.
Búgin «Alıans bank» AQ kredıtorlarynyń 90,5 paıyzy bankti qaıta qurylymdaý týraly jospardy qoldady. Osydan 9 kún buryn banktiń aktsıonerleriniń 99,74 paıyzy «Temir bank», «Fortebank», «Alıans bank» bankteriniń birigýin qoldap daýys bergen bolatyn. Qazirgi tańda úsh uıymnyń birigýinen quralǵan «Forte bank» dep atalatyn jańa banktiń menshikti kapıtaly 900 mln AQSh dollaryn (160 mlrd teńge) qurap otyr.
Osyndaı nátıjemen jańa bank 3-orynǵa turaqtamaq. Aktıvter kólemi boıynsha birikken bank úzdik bestikke kire almaıdy. Alaıda, «Forte bank» AQ basqarma tóraǵasy Gýram Andronıkashvılıdiń aıtýynsha, Alıans bank sapaly qarjylandyrylǵan bank bolady. Onyń portfeli ótimdi bolmaq. «Biz Qazaqstannyń bank júıesi qalaı jumys jasaýy kerektigin kórsetemiz. Biz naryqty jaýlaýǵa daıynbyz. Bul bank qarjy naryǵy salasynda salmaqty oıynshy bolatynyna senemin», - dedi «Alıans bank» AQ basqarma tóraǵasy Tımýr Isataev.
Onyń aıtýynsha, jańa bank óziniń nesibesin tutynýshylyq nesıeleýden izdemek. Alaıda, nazardan ShOB salasy da shyǵarylmaıdy.
«Qazir bólshek nesıeleýge, sonyń ishinde kepildemesiz nesıeleýge suranys túsip keledi. Sondyqtan, osyny da eskere otyryp, ShOB-ty, zańdy tulǵalardy nesıeleýdi de basty nazarda ustaımyz», - dedi T.Isataev.
Jańa bankti kimder basqaratyny ázirge belgisiz. Aktsıonerlerdiń jıynynda ózgergen dırektorlar keńesi taǵaıyndalady. Bank basqarmasynyń bolashaq quramyn jańa dırektorlar keńesi saılaıtyn bolady.
