Birikken Arab Ámirlikteriniń jańa prezıdenti saılandy

NUR-SULTAN. QazAqparat – BAÁ Federaldyq joǵarǵy keńesi búgin sheıh Muhammed ben Zaıd Ál Nahaıandy Birikken Arab Ámirlikteriniń prezıdenti etip saılady, dep habarlaıdy QazAqparat WAM aqparat agenttigine silteme jasap.

BAÁ memlekettik agenttiginiń habarlaýynsha, Federaldyq joǵarǵy keńes búgin Ábý-Dabıdegi Ál-Múshrıf saraıynda Dýbaıdyń vıtse-prezıdenti, premer-mınıstri jáne bıleýshisi sheıh Muhammed ben Rashıd Ál Maktýmnyń tóraǵalyǵymen otyrys ótkizdi.

Prezıdent isteri mınıstrligi jarııalaǵan málimdeme boıynsha el konstıtýtsııasynyń 51-babyna sáıkes, sheıh Muhammed ben Zaıd Ál Nahaıan marqum sheıh Halıfa ben Zaıd Ál Nahaıannyń ornyna Birikken Arab Ámirlikteriniń prezıdenti bolyp saılandy.

Aıta keteıik, QR Prezıdenti Qasym-Jomart Toqaev Birikke Arab Ámirlikteriniń Prezıdenti sheıh Halıfa ben Zaıd Ál Nahaıannyń qaıtys bolýyna baılanysty kóńil aıtqan edi.

«Sheıh Halıfa Ámirlikterdiń damýy men halqynyń ıgiligi jolynda uzaq jyldar boıy qaltqysyz qyzmet etti. Qazaqstan halqy sheıh Halıfa Ál Nahaıandy ekijaqty qarym-qatynastardy nyǵaıtýǵa súbeli eńbek sińirgen tulǵa retinde este saqtaıdy. Marqumnyń ımany salamat bolsyn!» - dep jazdy Prezıdent óziniń Twitter-degi paraqshasynda.