Birikken Arab Ámirlikterinde qashyp júrgen qazaqstandyq 7 qylmysker elge qaıtarylýy múmkin
ASTANA. 12 sáýir. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasy men Birikken Arab Ámirlikteri arasyndaǵy Qylmyskerlerdi ustap berý týraly kelisimdi ratıfıkatsııalaý týraly» zańyn qabyldady.
Atalǵan kelisim 2009 jylǵy 16 naýryzda Ábý Dábıde jasalǵan bolatyn. Kelisimge sáıkes, eki memleket bir birine jasalǵan qylmysy úshin nemese suraý salýshy taraptyń ıýrısdıktsııasyna ishinara nemese tolyq jatqyzylatyn úkimdi oryndaýdy iske asyrý úshin izdestirilgen kez kelgen adamdy ustap berýge mindetteledi.
«Búgingi kúni ınterpol kanaldary arqyly belgili bolǵanyndaı, Birikken Arab Ámirlikterinde qazaqstandyq 7 qylmysker sottan qashyp, boı tasalap júr. Olardyń barlyǵyna qatysty ustap berý týraly suraý salǵanbyz. Alaıda bul másele qaralmady. Degenmen, resmı emes derekkózderge súıensek, Qazaqstan men BAÁ arasyndaǵy búgin qaralyp otyrǵan kelisim kúshine ense, ondaı qylmyskerlerdi elge qaıtarýǵa bolady», - deıdi Bas prokýror orynbasary Iogan Merkel.
Sondaı-aq eki el arasynda ustap berý birqatar jaǵdaılarda qarastyrylady. Atap aıtqanda, eger eki eldiń zańnamasyna sáıkes aıyptalýshynyń áreketteri bir jyldan kem emes merzimge bas bostandyǵynan aıyrý túrindegi jazany kózdeıtin qylmys bolsa, sonymen qatar eger suraý salýshy taraptyń quzyretti soty sottalýshynyń qatysýymen nemese onyń qatysýynsyz alty aıdan kem emes merzimge bas bostandyǵynan aıyrýǵa sottalsa ondaı azamattar ustap beriletin bolady. Budan bólek, eger ustap berýdi talap etetin qylmys saıası sıpattaǵy qylmys bolyp tabylsa, salynǵan suraý boıynsha adamnyń násili, dinı ustanymy, azamattyǵy nemese saıası senim belgileri boıynsha qýdalaýǵa baılanysty ekenine dáleldi negizder bolsa onda ustap berýge jol berilmeıdi.
Parlament qabyldaǵan zań Memleket basshysynyń qol qoıýyna jiberiledi.
