Birikken Arab Ámirlikterinde armııadaǵy mindetti qyzmet engizildi
ÁBÝ-DABI. QazAqparat - Birikken Arab Ámirlikteriniń prezıdenti sheıh Halıfa bın Zaıed Ál Nahaıan senbi kúni ámirliktegi er adamdardyń áskerı qyzmetten mindetti túrde ótetini týraly zań shyǵardy.
BAÁ-niń «Ýakalıat Anbaa El-Emarat» (WAM) ulttyq aqparat agenttiginiń habarlaýynsha, bul sheshim Parsy shyǵanaǵyndaǵy arab memleketiniń Taıaý Shyǵys aımaǵyndaǵy turaqsyzdyqtyń keńeıe túsýine alańdaýshylyǵynan týyndap otyr.
Zańnyń shyǵarylýy uldardy Otanǵa súıispenshilik, adaldyq jáne rııasyz qyzmet etý rýhynda tárbıeleý maqsattaryna saı keledi», - delingen WAM habarlamasynda.
Ámirlik basshysy sheıh Halıfa bın Zaıed Ál Nahaııan arab monarhııasynda mindetti áskerı qyzmet engizý ıdeıasyn alǵash ret bıylǵy qańtar aıynda aıtqan bolatyn. Zańǵa qol qoıylǵannan keıin ol densaýlyǵy jóninen medıtsınalyq talaptarǵa saı keletin 18 ben 30 jas aralyǵyndaǵy ámirliktegi er adamdardyń bárine qatysty. Ámirlik armııasyna alynǵan orta bilimdi azamattar toǵyz aı, al mektep attestaty joqtar áskerı boryshyn eki jyl óteıdi.
Ámirlikte áıelderdiń armııada qyzmet etýi mindetti emes. Eger áıelderdiń ózi tilek bildirse, toǵyz aı qyzmet etedi, onda da aldymen sharıǵat zańyna sáıkes qamqorshysynyń maquldaýy mindetti bolmaq.
BAÁ-degi áskerı qyzmet oqý kezeńderin, áskerı jattyǵýlardy jáne patrıotızm men qaýipsizdik jónindegi dáristerdi qamtıdy. Londondaǵy Halyqaralyq strategııalyq zertteýler ınstıtýtynyń málimetterine qaraǵanda, BAÁ Qarýly kúshterinde 51 myń adam bar, onyń shinde Qurlyqtaǵy áskerde - 44 myń, áskerı-teńiz fotynda - 2,5 myń adam, áskerı-áýe kúshterinde 4,5 ásker qyzmet etedi.
