Birikken Arab Ámirligi Qazaqstan Elshiligine jer telimin bóledi

NUR-SULTAN. QazAqparat – Májilistiń jalpy otyrysynda «Qazaqstan Úkimeti men BAÁ Úkimeti arasyndaǵy Qazaqstannyń Birikken Arab Ámirlikterindegi Elshiliginiń jáne BAÁ-niń Qazaqstandaǵy Elshiliginiń qajettilikterine Astana qalasynda jáne Ábý Dabı qalasynda jer ýchaskelerin óteýsiz paıdalanýǵa ózara berý týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisimniń maqsaty - Qazaqstan Respýblıkasy men Birikken Arab Ámirlikteriniń aýmaǵynda eki memlekettiń elshilik obektilerin salý qajettiligi úshin jer ýchaskelerin ózara almasýdy quqyqtyq qamtamasyz etý.

Syrtqy ister mınıstri Muhtar Tileýberdiniń aıtýynsha, 2017 jyly 18 qańtarda Ábý Dabı qalasynda jasalǵan atalǵan kelisimdi ratıfıkatsııalaý ekijaqty yntymaqtastyqty odan ári jandandyrý ári dıplomatııalyq qatynastardy damytý úshin mańyzdy bolyp tur.

Taratylǵan málimetterge qaraǵanda, osyǵan baılanysty, óteýsiz jer paıdalaný shartymen 49 jylǵa keıinnen osyndaı merzimge uzartý múmkindigimen, bizdiń elimizge Ábý Dabı qalasynan alańy 1,2 gektar bolatyn jer ýchaskesi beriledi jáne tıisinshe Birikken Arab Ámirlikterine Nur-Sultan qalasynan alańy 2,6 gektar bolatyn ýchaske beriledi.